DILI, 13 jullu 2021 (TATOLI)–Profesór na’in-66 hosi eskola haat iha Ensinu Báziku Sentrál Akadiruhun, Ensinu Báziku Filiál Nu’ularan, Ensinu Báziku Masaur no Ensinu Báziku Metiaut to’o agora seidauk simu vasina.
Notísia Relevante : Eskola 76 iha kondisaun re-ativa ensinu aprendizajen prejensiál
Xefe Gabinete Apoiu Tékniku (GAT) iha Eskola Ensinu Báziku Sentrál (EBC) Bidau Akadiruhun, Dili, Cesaltino Francisco de Asis, relata katak totál profesór iha eskola haat ne’e hamutuk 107., maibé profesór 44 simu ona vasina no falta 66 mak seidauk vasina.
Cesaltino informa katak totál profesór 107 hosi eskola ensinu báziku haat ne’e kompostu hosi profesór EBC Akadarihun iha 53, na’in 25 vasina ona falta 28, EBF Nu’ularan iha profesór 20, na’in 15 vasina ona no falta na’in-lima (5), EBF Bidau Masaur totál profesór 15, na’in-neen (6) vasina ona falta profesór na’in-sia (9), seidauk vasina, nune’e mós profesór EBF Metiaut totál profesór 14, na’in-neen (6) vasina ona no falta na’in-ualu (8) mak seidauk.
“Ami nia parte tenta kontaktu ona ho profesór na’in-66, maibé balun de’it mak atende. Informasaun ne’ebé ami simu iha na’in-15 mak moras hela, inan isin rua na’in-neen (6) no inan fó susu na’in-lima (5) ne’ebé na’in-26 iha ona informasaun falta na’in 40 mak seidauk iha informasaun,” Cesaltino Francisco Asis, bá Agência Tatoli iha eskola EBC Akadiruhun, Dili, tersa ne’e.
Nia promote sei esforsa nafatin atu hetan informasaun hodi bele rezolve profesór ne’ebé seidauk vasina atu bele hakat bá sentru vasinasaun ne’ebé besik hodi hetan vasinasaun.
Diretór Servisu Edukasaun Munisípiu Dili, Duarte Bragansa informa katak posibilidade Vise-Ministru Edukasaun sei anunsia rezultadu servisu ne’ebé Edukasaun Munisípiu Dili halo ona atu re-ativa prosesu ensinu aprendizajen prejensiál iha loron 15 jullu.
Polítika Governu nian ne’ebé Ministériu mantein hodi aplika maka eskola ne’ebé atu hahú prosesu ensinu aprendizajen, professor no estudante ho idade tinan 18 bá leten tenke simu ona vasina entre 60% bá leten.
Jornalista : Tomé Amado
Editór : Francisco Simões
