iklan

EKONOMIA, LAUTEIN, MUNISÍPIU, Uncategorized

Uma-ka’in 1.596 iha Lautém seidauk asesu eletrisidade

Uma-ka’in 1.596 iha Lautém seidauk asesu eletrisidade

Postu administrativu Iliomar. Imajen dok Tatoli.

DILI, 14 jullu 2021 (TATOLI)—Eletrisidade Timor-Leste, Empreza Públika (EDTL,E.P), munisípiu Lautém, rejista uma-ka’in 1.596 iha munisípiu ne’e mak seidauk asesu liña eletrisidade.

“Planu Governu iha tinan ida-ne’e sei foka liu ba suku sira-ne’ebé seidauk asesu ba liña eletrisidade no ita espera tinan oin ita-nia aldeia sira bele asesu hotu ona,” Supervizór EDTL,E.P, munisípiu Lautém, Chiquito dos Santos, hateten ba jornalista Agência Tatoli via telefónika kuarta ne’e.

Notísia relevante:74% populasaun Lautem asesu ona bee-moos

Tuir dadus hosi EDTL,E.P munisipál katak, Lautém iha postu administrativu lima, ho nia-suku hamutuk 34, aldeia hamutuk 151.

“Entaun, suku hotu-hotu asesu ona liña eletrisidade maibé hosi suku-sira ne’e iha aldeia 22 mak seidauk asesu ho uma-ka’in 1.596,” nia hateten.

Aldeia 22 ne’ebé seidauk asesu liña eletrisidade mai hosi postu administrativu Lospalos suku soru iha aldeia rua, ho totál uma-ka’in 164, postu administrativu Iliomar iha suku lima ho nia-aldeia sanulu ne’ebé iha totál uma-ka’in 425, postu administrativu Luro ho nia-suku tolu, aldeia sia ho totál uma-ka’in 283, no postu administrativu Lautém ho nia-suku lima, aldeia ualu ho totál uma-ka’in 578.

Jornalista: Arminda Fonseca

Editór: Francisco Simões

iklan
iklan

Leave a Reply

iklan
error: Content is protected !!