DILI, 22 jullu 2021 (TATOLI) – Prezidente Federasaun Futeból Timor – Leste (FFTL), Francisco Jerónimo, informa katak sábadu, semana ne’e, federasaun sei realize kongresu anuál hodi relata servisu durante ne’e ba kongresista sira.
Notísia Relevante : Treinadór futeból feminina na’in-24 termina formasaun
“FFTL kada tinan tenke halo kongresu ne’e regra internasionál FIFA husu kada tinan tenke halo kongresu, atu nune’e, prezidente bele aprezenta ba kongresista sira iha mandatu saida mak atinje ona, saida mak seidauk no tenke aprezenta ba kongresista sira hodi hetan aprovasaun,” Prezidente FFTL, Francisco Jerónimo informa ba Agência Tatoli iha edifísiu FFTL, Dili, kinta ne’e.
Nia dehan, loloos kongresu anuál ne’e re-aliza ona iha fevreiru liubá, tanba pandemia global COVID-19 nune’e 24 jullu foin mak re-aliza.
Servisu FFTL nian halo iha 2020 mak halo negosiasaun ho Governu oinsá atu hetan rai nune’e bele hala’o infraestrutura liu-liu atu kria kampu futeból ida ne’ebé kualidade no di’ak.
Servisu seluk kona-ba jogu no seluk tan ladún hala’o tanba pandemia COVID-19. Tanba ne’e iha 2021 nia rohan ba to’o 2022 pandemia COVID-19 ladún afeta mak FFTL sei aselera servisu sira hotu.
“Ha’u halo ona proposta husu ba Governu, ko’alia mós ho Primeiru-Ministru konkorda atu Governu bele distribui Kampu Demokrasia mai FFTL atu dezenvolve no halo tan kampu ki’ik rua iha laran no kampu boot ida hodi bele prepara ba jogu internasionál ba sira U-18 ba kraik ne’e. Ami sei halo ho nia tribune, prosesu lao ona horiseik ha’u sei ko’alia hela ho Primeiru-Ministru no Ministru Justisa atu ba oin bele haree halo atribuisaun,” nia hateten.
Bainhira Governu entrega ona kampu demokrasia ba FFTL mak sira nia parte informa ba FIFA hodi hetan apoiu atu halo konstrusaun ba kampu ne’e.
Jornalista : Hortencio Sanchez
Editór : Francisco Simões
