Konstrusaun UKL iha Uma-Uain Leten atinje 25%
VIQUEQUE, 23 jullu 2021 (TATOLI)—Konstrusaun Uma Kbiit La’ek (UKL) hamutuk tolu iha aldeia Bauain, suku Uma-Uain Leten, postu administrativu Viqueque Vila, munisípiu Viqueque atinje ona 25%.
“Konstrusaun UKL iha suku Uma-Uain Leten atinje ona 25%, tanba fundasaun uma-nian remata ona no agora serbisu kontinua,” Xefe suku Uma-Uain Leten, Martino Soares Gusmão, hateten ba jornalista Agência Tatoli, iha suku Uma-Uain Leten, ohin.
Notísia relevante:Benefisiáriu UKL Lacluta agradese Governu
Autoridade lokál ne’e agradese ba Governu, tanba durante ne’e komunidade kbiit la’ek barak mak sai benefisiáriu ba programa ne’e.
Nia dehan, benifisiáriu na’in-tolu ne’ebé iha, detetadu hosi ekipa task force bainhira hala’o verifikasaun iha terrenu katak, kondisaun uma vulnerável duni.
Ekipa task force mós detekta katak, suku Uma-Uain Leten iha família kbiit la’ek hamutuk uma-ka’in 156 ne’ebé presija duni apoiu liu hosi programa UKL.
Jornalista: Vitorino Lopes da Costa
Editór: Cipriano Colo
