VIQUEQUE, 02 agostu 2021 (TATOLI)—To’o fim fulan jullu, populasaun na’in 21.845 hosi munisípiu Viqueque, simu ona vasina AstraZeneca.
Dadus ne’e hato’o hosi diretór Serbisu Saúde munisípiu Viqueque, Francisco de Carvalho, ba jornalista Agência Tatoli, segunda ne’e.
Notísia relevante:COVID-19: pozitivu 154, rekoperadu 41 no ativu 983
“Atividade vasina sei kontinua la’o iha postu saúde no sentru saúde-sira. Ami mós halo teste masal ba populasaun ne’ebé kontaktu ho pasiente pozitivu COVID-19. Iha semana kotuk ami halo teste masal ba populasaun na’in 77, no iha na’in-20 detetadu pozitivu ne’ebé agora daudaun iha hela izolamentu,” Francisco de Carvalho, hateten.
Hosi na’in 21.845 ne’e, sira ne’ebé simu doze dahuluk iha na’in 20.534 no doze daruak na’in 1.311.
Dadus COVID-19 hosi Sentru Integradu Jestaun Krize (SIJK), iha 01 agostu 2021, munisípiu Viqueque iha kazu pozitivu durante oras 24 ikus ema na’in-ida, kazu rekopera iha oras 24 ikus laiha, kazu ativu pozitvu hamutuk na’in-48, komulativu rekoperadu na’in 268, komunilativu kazu komfirmadu na’in 317, kumulativu óvitu na’in-ida no klasifikasaun transmisaun kazu iha cluster.
Iha fatin seluk presidente CIJC husi Munisípiu Viqueque atuál adiministradór munisípu, Januario Soares ‘Bolly’ haktuir, kazu pozitivu covid-19 ne’ebé aumenta ba 48, populasaun tenke mantein kumpre regra prevensaun hosi Organizasaun Mundiál Saúde (OMS) no Ministériu Saúde (MS) atu moras ne’e labele da’et.
Jornalista: Vitorino Lopes da Costa
Editór: Ciprino Colo
