iklan

DILI, EDUKASAUN, NASIONÁL

CNC partilla informasaun Chega ba komunidade musulmanu

CNC partilla  informasaun Chega ba komunidade musulmanu

Diretór Ezekutivu Centro Nacional Chega (CNC), Hugo Maria Fernandes, entrega livru relatóriu Chega nian ba Vise-Prezidente Konsellu Nasionál Izlámiku Timor-Leste (KONISTIL), Abdulah António Soares. Imajen Tatoli/Arminda Fonseca

DILI, 12 agostu 2021 (TATOLI)-Centro Nacional Chega (CNC), kinta ne’e, partilla informasaun kona-bá papél CNC nian no rekomendasaun sira hosi relatóriu CVAR no Chega nian  ba komunidade musulmanu iha Timor-Leste (TL).

Diretór Ezekutivu CNC, Hugo Maria Fernandes, hateten atividade disemina relatóriu Komisaun Verdade no Amizade (CVA) entre Timor-Leste  ho Indonézia nian ba komunidade musulmanu iha Timor-Leste tanba tinan tolu antes ne’e CNC la’o ba munisípiu sira entaun tinan ne’e planu ba grupu relijiozu sira.

“Ami mai fahe saida mak iha relatóriu Chega nia-laran, tanba relatóriu CVAR nia laran ne’e ko’alia kona-ba konflitu pasadu hosi tinan 1974 – 1999 no CVA ne’e ko’alia kona-ba akontesimentu iha 1999 nian de’it, entaun relatóriu rua ne’e ita halo rezumu de’it, katak funu hahú iha 1974-1999 ne’e hamosu violasaun direitu umanu, no violasaun direitu umanu refere la’ós Indonézia de’it mak halo, maibé Timor-Leste mós halo maibé boot hosi Indonézia tanba sistemátiku planu halo violénsia iha fatin barak,” Hugo Maria Fernandes informa ba jornalista-sira iha Meskita An-nur, Kampung Alor, Dili,

CNC hahú disemina informasaun ba komunidade musulmanu iha Timor-Leste, no 28 agostu, sei kontinua ba igreja protestante Hosana, mak foin kontinua ba igreja katóliku sira.

Vise-Prezidente Konsellu Nasionál Izlámiku Timor-Leste (KONISTIL), Abdulah António Soares, hateten rekomendasaun hosi CVAR nian importante tebes ba jerasaun musulmanu, liu-liu estudante-sira tanba durante istória konflitu pasadu nian ne’e iha matéria kurríkulu eskola nian.

“Ba oin ita sei servisu hamutuk ho Chega, oinsá mak hasa’e ita-nia koñesimentu patriotizmu nasionalizmu ba nasaun ida-ne’e. Espera liuhosi diseminasaun informasaun CNC nian ne’e ami bele hola parte programa balu hosi CNC no loron ruma ha’u sei lori ha’u-nia komunidade bele vizita diretamente ba CNC,” nia hatutan.

Iha diseminasaun informasaun Chega ne’e mós Diretór Ezekutivu CNC, Hugo Maria Fernandes, entrega mós livru relatóriu Chega nian ba Vise-Prezidente KONISTIL Abdulah António Soares.

Jornalista   : Arminda Fonseca

Editór         : Francisco Simões

 

iklan
iklan

Leave a Reply

iklan
error: Content is protected !!