SIJK seidauk fó resposta ba pedidu AFTL realiza jogu

DILI, 12 agostu 2021 (TATOLI) – Sekretáriu Jerál Asosiasaun Futeból Salaun Timor-Leste (AFTL), Fernando Baptista, informa AFTL haruka ona pedidu ba Sala Situasaun Sentru Integradu Jestaun Krize (SS-SIJK) atu fó autorizasaun ba jogu Pra Liga Futsal, maibé to’o agora seidauk iha resposta pozitivu ba pedidu ne’e.
“Tuir planu atu re-ativa duni jogu Pra Liga iha 20 agostu agora, infelizmente até agora parte SS-SIJK no Ministériu Saúde seidauk responde ami nia pedidu autorizasaun ne’ebé submete ona ba sira liuhosi FFTL,” Fernando Baptista informa ba Agência Tatoli iha Dili, kinta ne’e.
Diresaun kompetisaun halo ona kalendáriu ba jogu nian no sábadu agora Komisaun Organizadór sira ba hamoos ona kampu nune’e desizaun loos ona bele realiza jogu iha kampu multifunsaun Ministériu Defeza, Fatuhada, Dili.
Iha sorin seluk Adjuntu Sekretáriu Jerál Federasaun Futeból Timor-Leste (FFTL), Frederico Martins hateten, pedidu haruka ona ba SIJK maibé seidauk iha resposta autorizasaun.
“Ami haruka ona pedidu pakote jogu liga feto, liga mane no kopa FFTL no Pra Liga Futsal rasik, tuir informasaun katak sei hela desizaun ida mak SIJK sira sei tetu jogu hala’o iha adeptu ka laiha adeptu, maibé jogu sei hala’o duni,” Frederico hateten.
Jornalista : Hortencio Sanchez
Editór : Francisco Simões

