DILI, 14 agostu 2021 (TATOLI)-Organizasaun arte marsiál, Ikatan Keluarga Silat Putera Timor-Leste (IKS PTL) Kera Sakti, sábadu ne’e, halo asaun solidariedade hodi apoiu kulisaun 100-resin ba uma-kain 144 ne’ebé sai vítima inséndiu iha eis merkadu Comoro, Dili, iha loron 29 jullu 2021.
Notísia Relevante : Governu asegura ona vítima inséndiu eis merkadu Comoro
Koordenadór nasionál IKS PTL Kera Sakti, António Rangel, hateten asaun solidariedade ba vítima hirak ne’e ho kuantidade ki’ik, maibé sira hatudu ho domin hodi hakmaan vítima sira ne’ebé sofre iha inséndiu loron hirak liubá.
“Ami halibur malu hodi apoiu ba ita-nia família ne’ebé hetan susar no ita hotu hanesan Timor-oan hodi halo asaun solidariedade. Tanba ne’e, ohin ami halibur malu iha ne’e, hodi tau forsa hamutuk atu oinsá tulun ita-nia belun ne’ebé afeta ba inséndiu, foin lalais ne’e,” António Rangel hateten iha ámbitu distribuisaun apoiu solidariedade ba vítima inséndiu sira iha eis Merkadu Comoro, Dili.
Nia hatutan, apoiu hirak-ne’e hatutan hosi solidariedade hosi membru IKS PTL Kera Sakti hotu hosi ranting (ramu klasifikasaun) hotu-hotu iha Dili laran no agradese mós ranting sira seluk ne’ebé mós fó ona kontribuisaun.
Iha fatin hanesan diretór ezekutivu IKS PTL Kera Sakti, Samuel Guterres, afirma IKS PTL Kera Sakti hanesan organizasaun arte-marsiál ida, asume mós papél importante hodi tulun komunidade tanba konsidera dala barak públiku nia perspetiva ba organizasaun sempre ladi’ak.
Nia fundamenta katak organizasaun arte marsiál nia lala’ok la’ós atu kria problema maibé harii pás no estabilidade, nune’e mós kontribui ba halo atividade sosiál hodi apoiu vítima inséndiu sira, inklui vítima sira ne’ebé afeta husi inundasaun.
Antes ne’e, Governu ho mós Lider Karizmátiku, Kay Rala Xanana Gusmão mós asegura ona vítima inséndiu sira-ne’e, liuhosi sira-nia apoiu institusionál no apoiu pesoál hodi responde ba nesesidade bázika vítima inséndiu sira-nian.
Jornalista : Osória Marques
Editór : Francisco Simões
