DILI, 18 agostu 2021 (TATOLI)—Polísia Nasionál Timor-Leste (PNTL) liuhosi Batallaun Ordem Públika (BOP) no Kompañia Operasaun Espesiál (COE), detein tán timoroan na’in-haat ne’ebé hakat ilegál fronteira terrestre Timor-Leste (TL) no Indonézia.
Ekipa polísia lidera hosi Komandante BOP kompañia Delta, Inspetór Rosalino dos Santos no Komandante Pelotaun COE, Inspetór Asistente Polísia, Júlio Bosco, halo detensaun ba joven-sira iha kuarta dader, iha aldeia Huluati, suku Memo, postu administrativu Maliana.
Notísia relevante:Sidadaun na’in-rua hakat ilegál hosi Atambua mai TL
“Ita detein tan joven mane na’in-haat ho evidénsia komprovativu-sira hanesan farda treinu arte marsiál iha área fronteira, ne’ebé ho intensaun ba sae sintu iha Indonézia,” Komandante UEP, Superintendente Xefe Polísia, Orlando Gomes, hateten liuhosi komunikadu, kuarta ne’e.
Joven na’in-haat ne’e, iha na’in-tolu ho inisial EF, LfL no OC, mai hosi aldeia Atus suku GIldapil, tama iha 22 jullu 2021 no sae sintu iha 16 agostu.
Na’in-ida seluk ho inisiál MA hosi aldeia Coshal, suku Saburai no sira na’in-haat ne’e hosi munisípiu Bobonaro.
Tuir prosesu normál, polísia sei halo identifikasaun no submete ba parte saúde, hodi kumpre kuarentena no bainhira pasa ona mak sei loke prosesu.
Jornalista: Nelson de Sousa
Editór: Cipriano Colo
