OÉ-CUSSE, 19 agostu 2021 (TATOLI)—Tanba númeru kazu pozitivu COVID-19 iha RAEOA kada loron aumenta, mak Edukasaun Rejiaun Administrativa Espesiál Oé-Cusse Ambeno (RAEOA) deside suspende tán aula prezensiál ba loron 14.
Notísia Relevante: COVID-19 iha RAEOA: Pozitivu 19, ativu 133 no rekoperadu 36
“Ita simu orientasaun hosi reuniaun autoridade, tanba númeru kazu pozitivu COVID-19 kada loron aumenta ba beibeik mak parte Edukasaun deside suspende aula prezensiál ba loron 14,” Diretór Edukasaun RAEOA, Daniel Mauno, informa ba Agência Tatoli iha Santa Rosa, Suku Costa, Sub-Rejiaun Pante Makasar, Óé-Cusse, kinta ne’e.
Dirijente edukasaun ne’e hateten, tuir lolos aula-prezensiál ativa ona bainhira kazu COVID-19 tun, tanba iha semana kotuk autoridade RAEOA liuhosi Sekretáriuu Rejionál Asuntu Edukasaun no Solidariedade Sosiál hasai ona sirkulár ida ho númeru 146/DEJD-ZEESM TL/VIII/2021 hodi suspende hikas prosesu aprendizajen ba estudante sira hahú hosi nivél ensinu pre-eskolár to’o ensinu sekundária, maibé tanba kazu pozitivu sa’e beibeik entaun edukasaun deside supende fali tán.
Nune’e mós, tanba iha loron 18 agostu, Governu liuhosi reuniaun Konsellu Ministru (KM) deside no aprova tán projetu rezolusaun Governu hodi mantein impozisaun serka sanitária iha Munisípiu Ermera, Dili, no inklui RAEOA to’o fulan ne’e nia rohan.
“Entaun, ita deside adianta ba loron 14 tán. Karik kazu ne’e tun mak ita reativa atividade aula prezensiál. Maibé, kuandu kazu ne’e aumenta, ita sei adianta tan nune’e ita hein to’o kazu COVID-19 nia núumeru tun ona mak foin aviza fali atu hahú reativa eskola sira,” nia dehan.
Razaun suspende aula prezensiál, dirijente edukasaun ne’e informa ona ba Ministériu Edukasaun Juventude no Desportu (MESD) tanba iha RAEOA daudaun ne’e kazu pozitivu COVID-19 kada loron aumenta, nune’e bele afeta ba estudante sira.
Tanba ne’e, nia apela ba estudante no profesór sira atu hakbesik-an ba fasilidade saúde, nune’e bele simu ona vasina tanba bainhira reativa atividade aula prezensiál sei presiza kartaun vasina kada eskola sira.
Entretantu tuir dadús hosi Sentru Informasaun Prevensaun no Mitigasaun COVID-19, iha kinta (17/08), iha RAEOA totál kazu positivu COVID-19 na’in-19, ativuu 133, rekoperadu na’in-36 no hein rezultadu teste swab na’in-34.
Jornalista : Abílio Elo Nini
Editór : Cancio Ximenes
