DILI, 23 agostu 2021 (TATOLI)0 Universidade da Paz (UNPAZ) no Universidade Dili (UNDIL) halo pagamentu subsídiu propinas atinje ona 50%.
Notísia Relevante : MESSK monitoriza orsamentu izensaun propinas no pulsa internet
Reitór UNPAZ, Adolmando Amaral informa, kona-ba orsamentu izensaun propinas ne’ebé VIII Governu liuhosi Ministériu Ensinu Superiór Siénsia no Kultura (MESSK) haruka ba UNPAZ orsamentu refere hamutuk millaun $1-resin ba estudante ne’ebé asesu ba propinas refere no pulsa internet hamutuk 9.176.
“Hosi orsamentu ne’ebé Governu haruka mai ami, ami halo ona pagamentu ba estudante 9.166 ne’e atinje ona 50% no dadus ita submete ona ba Ensinu Superiór, tanba ami kumpre regra hosi MESSK nian fó loron 15 hafoin hetan transferénsia osan, tenke hato’o relatóriu preliminar, ne’ebé daudaun ne’e ami sei kontinua ita garante fulan agostu nia rohan 100%,” Adolmando Amaral hateten ba Agência Tatoli iha nia knaar fatin UNPAZ, Dili, segunda ne’e.
Nia hatutan, orsamentu izensaun propinas ne’ebé Governu haruka ba UNPAZ, antes ne’e, estudante balu selu uluk sira-nia propinas liu-liu estudante-sira hanesan semester ida, rua, tolu no hitu kuaze 50% sira selu ona propinas.
“Ne’ebé bainhira ita-nia Governu deside atu selu estudante sira-nia propinas ami prepara formatu rua, ida osan refere kontinua selu semester no ida seluk ka fó fila osan ba sira ne’ebé estudante balu ne’ebé selu hotu ona hili kontinua selu semester no balu fó fila sira-nia direitu, tanba polítika Governu, nian fó subsídiu ne’e $ 150 ba kada estudante maibé realidade hosi transferénsia bazeia ba propinas ne’ebé aplika iha kada Ensinu Superiór.
“Entaun ami iha ne’e propinas la to’o $150, maibé to’o $140 tanba propinas aas ba ami-nia estudante fakuldade Enjeñaria ne’e asesu ba $140, Saúde Públika $135, fakuldade ba ekonomia no seluk tan ne’e ba $110,” nia dehan.
Kona-ba pulsa, nia dehan, estudante hotu-hotu hetan maibé ida ne’e operadór telekomunikasaun sira mak halo transferénsia diretamente ba estudante sira-nia simcard to’o agora laiha estudante ida mak ba reklama katak sira la hetan, signifika estudante sira hetan hotu pulsa tuir planu kada loron 15 operadór telekomunikasaun sira transfere pulsa $5.00 to’o alvu $30.00/ema.
Iha fatin hanesan, Estudante Fakuldade Enjeñaria Sivíl, Marcál da Costa Sarmento hateten, nia parte kontente no agradese tebes ba Governu tanba ajuda ona nia fó subsídiu propinas nian no pulsa ba nia durante iha situasaun COVID-19.
Vise-reitór UNDIL, Tomas Agusto Correia, dehan, orsamentu izensaun propinas ba UNDIL ne’e hamutuk $622.277,50 ba estudante ne’ebé asesu ba subsídiu hamutuk na’in-6.010
“Entaun, totál, estudante ne’ebé hetan ona subsídiu semester ninian hamutuk na’in-2.992 (50%) ho totál orsamentu $ 335.937,50 (54%) no seidauk asesu ba propinas hamutuk nain- 3.018 no totál orsamentu ne’ebé seidauk ezekuta hamutuk $ 286. 340,00 (46%),” nia dehan.
Nia esklarese, subsídiu ba estudante UNDIL ne’e iha kategoria lima hahú hosi $150, $130, $115, $57,050 tanba bazeia ba fakuldade no semester tanba estudante balu livre ona hosi teoria.
Ba estudante sira seidauk asesu ba propinas hamutuk na’in-11 3.018 no totál orsamentu ne’ebé seidauk ezekuta hamutuk $286,340.00 (46%) semana oin ekipa UNDIL sei lori tun ba Munisípiu 12 inklui Rejiaun Administrativa Espesiál Oé-Cusse Ambeno (RAEOA) lori lista ba munisípiu sira fó estudante sira halo rejistu ba propinas izensaun nian tanba daudaun estudante maioria mak sei iha foho seidauk simu vasina.
Jornalista : Arminda Fonseca
Editór : Francisco Simões
