OÉ-CUSSE, 02 setembr 2021 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), kinta ne’e hala’o lansamentu distribuisaun foos liuhosi programa Food for Work ba benefisiáriu uma kain 275 iha aldeia Ulas, suku Taiboko, sub-rejiaun Pante Makasar.
Prezidente Autoridade RAEOA, Arsénio Paixão Bano, hateten distribuisaun foos saka ida ba benefisiáriu sira-ne’e durante fulan-rua, tanba komunidade oferese rai ektare 22 ba autoridade atu konserva bee-matan Oél-Taseo ho Oél-Ulas nomós kontribui voluntariamente halo lutu haleu bee-matan sira-ne’e.
Notísia Relevante: Autoridade RAEOA identifika bee-matan Oél-Ulas dada bee ba uma kain 126
“Ha’u kontente no agradese ba lia-na’in no dato sira, tanba oferese bee-matan rua ne’e atu konserva. Ita konserva didi’ak sei fó moris ba populasaun tomak, ba jerasaun sira iha futuru labele akontese krize bee-moos. Tanba ne’e, imi kontribui halo lutu, autoridade apoia ai-han ba imi. Antes ne’e imi la’o dook buka bee-moos iha fatin dook, maibé bainhira konserva hotu, sei dada besik imi nia uma no fasil ona asesu bee-moos,” Arsénio Paixão Bano hateten liuhosi nia diskursu iha serimónia lansamentu fahe ai-han ba benefisiáriu sira.
Nia kontente tanba iha faze sosializasaun ba identifikasaun bee-matan ne’e, dato sira iha aldeia Ulas la-konkorda atu entrega bee-matan sira-ne’e ba programa Food for Work, maibé tanba populasaun nia nesesidade to’o ikus lider komunitáriu ho lia-na’in sira konkorda oferese bee-matan rua ne’e ba autoridade atu halo konservasaun.
Hanesan autoridade másimu iha RAEOA, nia husu ba xefe suku, xefe aldeia, juventude sira no komuunidade atu proteje bee-matan, hadia estrada rasik, hadia eskola ka halo lutu ba fatin sekola no fasilidade saúde, nune’e autoridade bele fó apoia ai-han liuhosi programa Food for Work ne’e.
Sekretáriu Rejionál Asuntu Agrikultura, José Eta, hateten iha 2020 problema prinsipál iha Oé-Cusse liu-liu suku Taiboko mak menus ba bee-moos, entaun Sekretáriu Agrikultura nia responsabilidade mak kria programa konserva bee-matan sira hodi garante debitu bee-moos ba tempu bailoron naruk atu labele akontese tán krize bee-moos.
Servisu Dirasaun Agrikultura koopera hamutuk ho ONG lokál sira hanesan World Neighbor (WN), Asosiasaun Haburas Kapasidade Agrikultura no Ekonómia (AHCAE), Centro Educação Sívica Enclave Oé-cusse (CECEO), Binibu Faef Nome (BIFANO), konsege identifika bee-matan 58 ho totál área konservasaun hamutuk ektare 100,99, involve uma kain 3,735 kompostu hosi aldeia 32 iha suku 14 partensia ba sub-rejionál haat.
“Ita agradese ba komunidade tanba bee-matan 55 mak ita konserva ona. Komunidade halo ona lutu haleu bee-matan sira-ne’e no falta bee-matan tolu (3) iha suku Suni-Ufe, Naimeco mak seidauk konserva tanba konfinamentu domisiliáriu. Autoridade prepara ona ai-oan kuaze rihun 55 kuda haleu ba bee-matan sira ne’e,” nia dehan.
Xefe suku Taiboko, Joaquin Tafin, agradese ba autoridade tanba kria programa protesaun bee-matan ba suku Taiboko, liu-liu aldeia Ulas tanba protesaun bee-matan rua iha Ulas ne’e sei fó benefisiu ba uma kain 487 ho totál populasaun hamutuk 1392.
“Lori komunidade tomak iha suku Taiboko nia naran, ha’u oagradese ba autoridade tanba oferese ai-han ba komunidade durante fulan-rua. Ami promete sei tau matan no kolabora hamutuk ho autoridade atu proteje bee-matan sira-ne’ebé identifika ona atu konserva tanba ida-ne’e importante ba ema hotu nia nesesidade,” nia dehan.
Jornalista : Abílio Elo Nini
Editór : Cancio Ximenes
