DILI, 06 setembru 2021 (TATOLI) – Diretór Formasaun Profesór hosi Fakuldade Edukasaun Arte Umaniora Universidade Nasionál Timor Lorosa’e (UNTL), Marcelio Caetano de Sousa, konsidera kooperasaun UNTL ho Instituto Naçional de Formação de Docentes e Profissionais da Educação (INFORDEPE) tanba lei baze edukasaun ezije ema atu sai profesór mínimu grau akadémiku tenke baxarelatu no másimu lisensiatura.
“Inísiu UNTL hosi FEAH hala’o kooperasaun ho INFRODEPE hahú iha 2007 tanba atu rezolve problema ne’ebé maka INFORDEPE enfrenta, tanba inísiu kuandu sira loke kursu sira ne’e maibé to’o finalidade tenke hetan rekoñesimentu grau akadémiku hosi universidade de’it mak bele fó títulu,” Marcelio Caetano de Sousa, ba jornalista Agéncia Tatoli iha ninia servisu fatin FEAH, Liçeo., Dili, segunda ne’e.
Tuir Diretór Marcelio katak durante ne’e nia apoiu ona formasaun ba profesór nivel baxarelatu sira hosi iha semester I ho II iha munisípiu sira, atu nune’e, bele ajuda profesór sira bele hetan matéria ruma hodi reforsa sira nia program estájiu hodi prepara bá prosesu yudisium no graduasaun.
Iha konfinamentu obrigatóriu profesór 21 iha Fatubesi hetan de’it orientasaun matéria estájiu hosi media de’it. Programa estájiu profesór baxarelatu nian sei termina iha fulan novembru tinan ne’e. Signifika profesór estajiáriu sira sei kompleta estájiu durante fulan tolu hahú meadu segunda semana fulan agostu.
Programa estájiu ne’e ezije sira atu elabora kedan relatóriu final kona-ba atividade akadémika no atividade nian dala ida de’it depois aprezenta báauniversidade maka ekipa rua hosi UNTL ho INFORDEPE sei halo fali avaliasaun ba relatóriu finál sira ne’e kuandu parte rua konsidera sira ne’ebé mak pasa iha avaliasaun ne’e maka sei prepara gradua tuir kalendáriu akadémiku nian iha dezembru tinan ne’e..
Programa yudisium ne’e lahanesan baibain hala’o iha kada fakuldade, tanba tuir mapeamentu Universidade no INFORDEPE nian profesór baxarelatu ne’ebé atu tuir yudisium sei hala’o iha rejionál de’it. Signifika Baucau Viqueque, Lautem no Manatuto tuir yudisium iha Baucau, Maliana, Ermera tanba estudante barak sei hala’o iha ida-idak nia fatin de’it, depois Aileu Dili Liquiça yudisium iha Dili, Oekusi mesak no ikus Manufahi, Ainaro, covalima yudisium iha Ainaro.
Prezidente INFORDEPE, Manuel Gomez de Araújo katak lansamentu estájiu pedagójiku ba profesór baxarelatu 2.595 realiza ona iha 22 jullu. Daudaun ne’e sira halo hela estájiu iha eskola sentrál sira iha territóriu nasionál.
Profesór sira ne’e besik finaliza ona sira-nia programa estájiu tuir mapeamentu entre UNTL-FEAH ho INFORDEPE sei termina iha novembru. Maibé, daudaun ne’e iha Dili no munisípiu balun maka aplika hela medida konfinamentu obrigatóriu ne’ebé parte rua sei haree fali oinsá planu ruma ba estajiáriu sira ne’e.
Jornalista : Tomé Amado
Editór : Francisco Simões
