Komandu PNTL hato’o sentidu lutu ba família Inspetór Xefe Mauclau

DILI, 07 setembru 2021 (TATOLI)—Komandu Jerál, Polísia Nasionál Timor-Leste (PNTL), hato’o sentidu kondolénsia ba família matebian, Inspetór Xefe, Marçal Amaral Magno Guterres ‘Maucalau’ ne’ebé hakotu iis, iha tersa ne’e.
“Lori komandu nia naran hato’o sentidu kondolénsia pronfunda ba família matebian Inspetór Xefe, Mauclau ne’ebé horikalan hakotu-iis tanba sofre moras”, Portavós Komandu Jerál PNTL, Superintendente Xefe, Arnaldo Araújo, hateten ba jornalista-sira liuhosi konferénsia imprensa iha edifísiu Komandu Jerál, Caicoli, tersa ne’e.
Notísia relevante:Komandu PNTL presta omenajen ba Saudozu Loriku Matebian
Superintendente Xefe, Arnaldo Araújo la esplika detalla kona-bá moras ne’ebé matebian sofre to’o hakotu-iis, iha ospital maibé, parte Komandu sente triste tanba lakon ofisiál di’ak ida, ne’ebé durante ne’e fó an tomak ba serbí instituisaun.
Matebian tama instituisaun seguransa hahú iha tinan 2001 no daudaun ne’e kompleta ona tinan 19, durante ne’e hala’o kna’ar iha munisípiu Baucau, hafoin transfere mai Dili hanesan komandante iha eskuadra Vera Crus no daudaun muda fali mai inspesaun jerál iha Komandu Jerál.
“Normalmente, bainhira membru ida mate, Komandu sei haree direitu família liuliu feto faluk no oan ki’ak,” nia subliña.
Matebian mate ho idade 50 no hosik hela oan na’in-lima no família sei koordena ho Sentru Integradu Jestaun Krize (SIJK), hodi haloot mate-isin iha moris fatin postu administrativu Venilale, munisípiu Baucau.
Jornalista: Nelson de Sousa
Editór: Cipriano Colo

