DILI, 07 setembru 2021 (TATOLI) – Koordenadór Unidade Kurríkulu Nasionál (UKN), Pedro Ribeiro Gonçalves, informa Ministériu Edukasaun prodús ona rezumu matéria ba estudante sira no daudaun ne’e distribui ona ba eskola sira iha territóriu nasionál.
Notísia Relevante : MEJD distribui rezumu matéria primeiru periodu ba estudante 1.170
Prosesu distribuisaun rezumu matéria ba estudante sira iha territóriu nasionál lao nafatin hela, atividade ne’e realiza depois lansamentu iha loron 13 agostu liubá.
“Foin lalais ne’e ita halo de’it lansamentu iha sentru impresaun, agora maka ita foin halo distribui rezumu matéria ba alunu sira iha eskola hotu iha territóriu nasionál inklui eskola privadu katóliku no eskola komunidade sira,” Pedro Ribeiro Gonçalves bá jornalista sira iha ninia servisu fatin Vila Verde tersa ne’e.
Rezumu matéria sira kuandu remata ona UKN sempre halo konfirmasaun ka kontaktu ho diretór servisu edukasaun iha kada munisípiu atu hetan dadus hodi bele prepara rezumu matéria tuir nesesidade kada eskola sira.
Ministru Edukasaun Juventude no Desportu (MEJD) Armindo Maia deklara katak ninia parte sei esforsu atu prevee orsamentu iha sentru impresaun Comoro atu apoiu produsaun rezumu matéria ba estudante sira.
Jornalista : Tomé Amado
Editór : Francisco Simões
