iklan

NASIONÁL, EDUKASAUN, DILI

Estudante rihun 16-resin seidauk hetan kaderneta eskolár

Estudante rihun 16-resin seidauk hetan kaderneta eskolár

Kaderneta Eskolár. Imajen/Espesiál

DILI, 13 setembru 2021 (TATOLI) – Estudante ensinu báziku no ensinu sekundáriu purvolta rihun 49-resin reziste iha Munisípiu Ermera no Manufahi, menus rihun 16-resin mak seidauk hetan distribuisaun kaderneta eskolár.

Diretór Servisu Edukasaun Munisípiu Ermera (DSEME), Marcos Soares Martins, segunda ne’e, informa sira husu kaderneta eskolár purvolta rihun 27-resin ba edukasaun nasionál, maibé sira simu de’it kaderneta rihun 11-resin.

“Ami haruka dadus kompleta ba edukasaun nasionál ne’e hamutuk rihun 27-resin maibé ami simu de’it kaderneta hamutuk rihun 11-resin, sei falta rihun 16 mak seidauk haruka mai,” Marcos Soares Martins informa liuhosi telefone, segunda ne’e.

Marcos informa kaderneta rihun 11-resin ne’e distribui ona ba estudante ensinu báziku primeiru no segundu siklu iha tinan kotuk. Agora sei falta estudante ensinu báziku terseiru siklu no estudante sekundáriu purvolta rihun 16-resin mak seidauk hetan kaderneta eskolár.

Diretór ne’e esplika katak sei iha distribuisaun faze daruak maibé tanba ho situasaun serka sanitária no konfinamentu obrigatóriu ne’e maka difikulta tiha prosesu distribuisaun kaderneta eskolár ne’e no espera katak tempu besik prosesu ne’e bele lai fali hanesan baibain.

Diretór Servisu Edukasaun Munisípiu Manufahi (DSEMM), Vitorino do Carmo afirma katak dadus estudante hosi ensinu báziku to’o ensinu sekundáriu hamutuk rihun 18-resin maka reziste iha edukasaun Manufahi. Hosi totál estudante refere maioria hetan hotu ona distribuisaun kaderneta eskolár iha tinan kotuk.

Enkuantu atividade iha munisípiu rua ne’e mós to’o agora labele realiza tanba presiza hein despaixu hosi Ministru Edukasaun. Nune’e atividade ensinu aprendizajen prejensiál sei paradu hela.

Jornalista : Tomé Amado

Editór        : Francisco Simões

 

iklan
iklan

Leave a Reply

iklan
error: Content is protected !!