DILI, 23 setembru 2021 (TATOLI)-Besik fulan ida ona hariis-fatin públiku sira iha kapitál Dili hanesan, Largo Lecidere, Ponte B.J. Habibie Bidau, Cristo Rei no Jardin 05 de maiu, Colmera, taka ba públiku tanba pesoál sira ne’ebé kontrata hosi empreza privadu sira hodi tau-matan ba fasilidade públiku sira-ne’e la tama servisu.
Seguransa hosi kompañia PAX, Nelson da Silva ne’ebé destaka iha Largo Lecidere hateten, atu fulan ida ona traballadór sira hosi kompañia Nelses ne’ebé tau matan ba hariis-fatin públiku sira iha Dili inklui Largo Lecidere la tama servisu.
“Ami traballadór ne’ebé servisu iha Largo Lecidere ne’e iha kompañia tolu mak hanesan Tasi-Timor ne’e haree liu ba limpeza, PAX halo seguransa ba fatin ne’e no haree patrimóniu Estadu nian no kompañia Nelses mak foka liu ba haree hariis-fatin públiku sira, maibé fulan ida sira la tama servisu, entaun hariis sira-ne’e taka odamatan metin tanba vizitante sira mai uza la ho konsiénsia halo hariis-fatin fo’er,” Nelson da Silva ba Agência Tatoli iha Largo Lecidere, kinta ne’e.
Nia hatutan, durante traballadór hosi kompañia Nelses la tama servisu, sira mak ajuda haree hariis-fatin públiku sira-ne’e atu oinsá ema labele estraga sasán sira, maibé hanesan atu hamoos ne’e sira labele halo tanba sira iha ne’ebá ida-idak ho nia servisu.
Justino da Costa, nu’udar abitante ne’ebé vizita ba Largo Lecidere hateten, nia triste tanba hariis-fatin públiku iha Largo Lecidere tenke taka fali ba públiku no difikulta abitante sira halao movimentu iha Largo maka sente presiza hariis-fatin mas taka fali.
Kontratu maka termina ona
Hatán ba preokupasaun sira ne’e Sekretariadu Prezidente Autoridade Munisípiu Dili, António Moniz Clau hateten hariis-fatin públiku sira hanesan Largo Lecidere, Cristo Rei, Jardin Ponte B.J. Habibie no Jardin 05 de Maiu, daudaun ne’e odamatan taka tanba kontratu kompañia ramata.
Hosi 2019 mai to’o agostu 2021, Bee Timor mak kontratu kompañia Nelses hodi tau matan ba hariis-fatin públiku, maibé hosi fulan setembru nia laran ema laiha atu tau matan tanba kontratu hotu, entaun odamatan hariis-fatin tenke taka, maibé hahú hosi fulan outubru 2021, munisípiu Dili mak sei halo kontratu diretamente ba kompañia foun hodi tau matan ba hariis-fatin públiku sira iha kapitál Dili.
Jornalista : Arminda Fonseca
Editór : Francisco Simões
