DILI, 23 setembru 2021 (TATOLI) – Diretór Eskola Ensinu Sekundáriu Jerál (ESJ) 5 de maio, Becora, Manuel Verdial, informa atividade aula prejensiál ba estudante sira iha eskola refere sei hahú segunda (27/09) tanba eskola sei prepara metodolojia ensinu aprendizajen prejensiál.
Eskola ESJ 5 de maio hetan ona autorizasaun hosi Ministru Edukasaun Juventude no Desportu (MEJD), Armindo Maia, bele hahú aula prejensiál tanba eskola ne’e tama iha lista 90% profesores hetan hotu ona vasinasaun.
“Ami sei tur hamutuk fali atu haree fila fali maneira sira-ne’e para bele implementa iha prosesu ensinu aprendizajen nia laran,” Manuel Verdial informa ba Agência Tatoli iha nia servisu fatin, kinta ne’e.
Profesores iha eskola 5 de maio hamutuk 52, kompostu hosi voluntáriu na’in-rua (2), administrasaun na’in-ida (1), security na’in- ida (1) no permanente 48. Hosi totál profesores 52 ne’e, na’in 49 vasina ona falta profesores na’in-tolu iha tanba sei fó susu bebé.
Jornalista : Tomé Amado
Editór : Francisco Simões
