DILI, 25 setembru 2021 (TATOLI) – Estádiu Venue Jalan Besar Singapura mak sei sai sasin ba jogadór nasionál Timor-Leste na’in rua (2) husi U-23 hanesan Paulo Gally (21) no Mouzinho de Lima (10) tanba jogadór rua (2) ne’e mak avansadu prinsipál Timor-Leste nian hodi termina manan no lakon liu hosi marka golu.
Ekipa Timor-Leste konsidera jogadór rua (2) ne’e mak sai sniper hodi termina destinu Timor-Leste nian bainhira halai iha liña oin hodi marka golu hasoru adversáriu hosi Filipina, Singapura no Korea Súl iha outubru mai ne’e.
Ba Agência Tatoli via WhatsApp, Paulo Gally hateten sei reprezenta Timor-Leste ho responsabilidade iha jogu ne’e. Importante lori Timor ba oin,
“Ami husu timoroan hotu keta haluha halo orasaun mai ami atu iha jogu ne’e bele hatudu rezultadu di’ak,” Gally hateten, sábadu ne’e.
Treinadór ekipa selesaun nasionál Timor-Leste U-23, Fabio Maçado hateten ekipa Timor-Leste nian preparadu no prontu ona hein de’it arranka.
“Ekipa ita prepara ho di’ak, jogu mai ne’e difisil maibé ha’u konfia iha ha’u nia jogadór sira, sira sei halo tuir saida mak fó ba sira ita sei hetan saida mak ita hakarak liu husi rezultadu ne’ebé mak di’ak,” dehan treinadór ne’e.
Viajen selesaun U-23 iha problema
Adjuntu Sekretáriu Jerál Federasaun Futeból Timor – Leste (FFTL), Frederico Martins hateten, loloos jogadór sira arranka ba estranjeiru iha loron 07 outubru ne’e, maibé tanba kadeira aviaun la too difikulta viajen jogadór sira nian.
“Aviaun Malindo Air 07 outubru nakonu, entaun sei buka hela dalan seluk. Maibé, atu asegura ita-nia partisipasaun tanba limitasaun vou husi Dili ba rai seluk, ami husu ona Citilink ne’ebé mak iha vou loron 21 outubru nian atu asegura tiha kadeira mai ami hodi hein nafatin posibilidade seluk,” Frederico hateten.
Tuir oráriu ne’ebé iha, Timor – Leste sei joga kontra uluk ekipa uma-nain Singapura iha 25 outubru, 28 outubru sei kontra ekipa Korea Súl no ikus liu kontra Filipina iha 31 outubru. Hosi jogu hirak ne’e Timor- Leste manan sei ultrapasa ba faze sira tuir mai.
Jornalista : Hortencio Sanchez
Editór : Francisco Simões
Lakon menan nee buat normal da nran ktak Ita htudu Ita nx diciplina hdi ble hmorin Ita nx nasaun Tl
Viva Timor Leste