DILI, 28 setembru 2021 (TATOLI)—Polísia Nasionál Timor-Leste (PNTL), komandu munisípiu Dili, kontinua asegura motór hosi membru Grupu Arte Marsiál (GAM) hamutuk 100-resin, no hein despaixu Tribunál Distritál Dili (TDD), atu bele entrega fila-fali ba na’in.
“Evidénsia motorizada ne’ebé agora komandu halo apreensaun no rai hela iha ne’e ninia prosesu iha ona desizaun hosi TDD. Nune’e, hein hela karta despaixu atu bele entrega fila ba na’in,” Komandante PNTL, munisípiu Dili, Superintendente Xefe, Henrique da Costa, hateten ba jornalista iha kna’ar fatin, Caicoli, tersa ne’e.
Notísia relevante: PNTL detein ema na’in-rua tuda rahun karreta polísia
Kona-bá atributu arte marsiál-sira ne’ebé halo apreensaun mós parte polísia sei hein despaixu Tribunál, atu bele entregra hikas.
Antes ne’e, desizaun TDD aplika ona pena multa ba arguidu no arguida hamutuk na’in 117, nu’udár membru GAM, tanba faktu provadu pratika krime dezobediénsia, kada ema selu multa $15 no laiha kustu judisiáriu.
Tribunál aplika mós pena substituisaun, bainhira arguidu sira la kumpre pena multa durante prazu loron 15 maka, sei kumpre pena efetivu.
Arguidu sira antes ne’e hetan detensaun hosi PNTL, munisípiu Dili, iha 08 setembru madrugada, iha Manleuana, tanba hala’o atividade arte marsiál, hodi halibur-malu ema barak liu na’in-sanulu iha implementasaun konfinamentu domisiliáriu jerál iha Dili.
Durante iha terrenu, polísia halo apreensaun ba motorizada 100-resin, ho atributu arte marsiál no Ministéiru Públiku akuza ho krime dezobidiénsia ne’ebé previstu iha artigu 244, númeru 1, iha kódigu penál.
Iha artigu ne’e deskreve ema ne’ebé la halo tuir nafatin órden ka mandadu lejítimu komunikadu regularmente, ne’ebé autoridade ka funsionáriu kompetente mak fó, sei hetan prizaun tinan tolu ka multa.
Jornalista: Nelson de Sousa
Editór: Cipriano Colo
