DILI, 10 novembru 2021 (TATOLI)—Sekretáriadu Tékniku Administrasaun Eleitorál (STAE) prevee millaun $9.3 iha Orsamentu Jerál Estadu (OJE) 2022, liuhosi Dotações para Todo o Governo hodi bele organiza eleisaun prezidensiál iha marsu 2022.
“Ita iha proposta millaun $9,3, fundu kontijénsia liuhosi dotação todo Governo hodi organiza eleisaun prezidensiál iha tinan oin,” Diretór Jerál STAE, Acilino Branco, hateten ba jornalista sira hafoin halo audiénsia públika ho komisaun A Parlamentu Nasionál, iha Parlamentu Nasionál, kuarta ne’e.
Diretór ne’e hateten, iha OJE 2022 ne’e STAE prevee millaun $1,5 hodi foku ba programa transversal atu garante funsionamentu STAE nian no realiza resensiamentu biométriku ho sira seluk.
Iha audiénsia ne’e, STAE mós relata ezekusaun OJE 2021 ne’ebé atinje ona 86% nomós preparasaun sira ba eleisaun prezidensiál la’o hela no preparadu.
STAE kria hosi dekretu Governu N.º 2/2003, 23 jullu, hanesan órgaun hosi Ministéiru Administrasaun Estatál (MAE), responsavel hosi organizasaun no ezekusaun ba prosesu eleitorál hosi Estadu (Decreto-Lei n.º 1/2007 de 18 de janeiro).
Tuir livru 2 planu annual OJE 2022, STAE prevee $1,576,870 hodi aloka ba saláriu vensimentu $577,248, bens servisu $842,122, kapitál menór, kapitál dezenvolvimentu no transferénsia públika laiha
Orsamentu ne’e hodi finansia programa ida (1), sub-programa tolu (3) no atividade neen (6).
Programa boa-governasaun no jestaun instituisional ho nia sub-programa boa-governasaun no nia atividade apoiu jurídiku.
Sub-programa jestaun instituisionál nia atividade jestaun finanseira administrasaun no jestaun finanseira lojístika, jestaun rekursu umanu, aprovizionamentu jestaun kontratu.
Sub-programa administrasaun eleitorál nia atividade mak halo resensiamentu eleitorál no edukasaun eleitorál.
Jornalista : Nelson de Sousa
Editór : Cancio Ximenes
