DILI, 19 novembru 2021 (TATOLI)—Komisaun B ne’ebé trata asuntu Negósiu Estranjeiru, Defeza no Seguransa, husu sidadaun hotu atu kontribui ba pás no estabilidade iha kapitál Dili.
Prezidente Komisaun B, Deputadu José Agostinho Sequeira ‘Somotxo’, hateten reprezentante povu preokupa ho akontesimentu ema deskoñesidu hosi joven balun hana malu iha área kampu Alor, Dili, hodi rezulta vítima balun kanek, halo komunidade movimentu iha tempu kalan ne’e sente ladún seguru.
“Hanoin polísia atu halo estratéjia oioin sai profisionál maibé komunidade la kontribui, konflitu kontinua mosu. Tanba ne’e, importante tebes populasaun sira-nia devér atu kontribui kria pás no estabilidade,” Deputadu Somotxo hateten ba jornalista sira iha Parlamentu Nasionál, sesta ne’e.
Situasaun krime sira-ne’e mosu ho planeadu, bele mai hosi grupu no arte marsiál sira hodi hamosu instabilidade iha Kapitál Dili, nune’e autoridade seguransa liuhosi Polísia Nasionál Timor-Leste (PNTL) atu identifika autór hodi prosesu tuir lei ne’ebé vigór.
Deputadu ne’e, reprzentante povu iha Parlamentu Nasionál enkoroja servisu autoridade seguransa ho profisionál liután hodi atua krime sira-ne’ebé mosu, atu bele garante seguransa ho trankuilidade.
Eis Ministru Defeza ne’e hateten, entidade relevante sira seluk ne’ebé iha kompeténsia oinsá atu kontinua hasa’e formasaun edukasaun sívika sidadania ba sosiedade importante hodi oinsá kontribui ba estabilidade.
Jornalista : Nelson de Sousa
Editór : Cancio Ximenes
