DILI, 27 novembru 2021 (TATOLI)–Karketu Dili FC ho simblu manu Lakateu hanesan rai-na’in ba kapital Dili la konsege konkista nia vitória hodi hadau pontu tolu tanba Makikit Laulara la fó valda ba Lakateu atu hatun Makikit.
Realidade ne’e mak akontese ba ekipa Aileu no Dili ne’e iha jogu kontinuasaun Liga Futeból Timor-Leste (LFTL) ne’ebé hala’o iha Estádiu Dili sábadu lorkraik ne’e rezulta ekipa rua tenke fahe pontu hanesan ba malu.
Hosi rezultadu ne’e fó biban ba ekipa naran istimadu Matak Malirin ne’e hakat uitoan de’it ho pontu hitu maske lidera tabela klasifikasaun segundu lugar iha tabela klasifikasaun provizoriu mak Ponta Leste ho pontu neen, terseiru lugar Lalenok United FC ho pontu tolu, kuartu lugar SLB ho pontu lima, kuartu lugar Aitana ho pontu ida no Assalam no DIT kontinua hela iha lina ikus liu ho pontu mamuk.
Minutu primeiru hahú, ekipa rua lansa kedan kontra no atake ba malu liuhosi pasa bola hos ain ba ain hodi buka leet mamuk at hatama golu, nune’e bele fó vitoria ba ekipa ida-idak.
Hosi kontra no atake ne’ebé iha, fó sorte aat ba SLB tanba domina bola maibé laiha oportunidade hodi lansa golu ba ekipa adversáriu.
Enkuantu Karketu halo kontra atake makaas iha lina oin SLB nian, hodi fó ameasa makaas ba SLB nune’e iha minitu 20 jogadór Karketu, Mickael Eugene (88), konsege lees rede Karketu hodi muda rezultadu ba 1-0.
Golu ne’e halo SLB book an ladi’ak iha kampu laran. Karketu domina bola ho sutu barak hosi jogadór avansadu sira maibé bla la kona iha alvu. Enkuantu SLB nia rítmu jogu namlele maibé falla tebes ba Karketu atu halo tan golu, nune’e minutu primeira parte termina laiha golu ruma mak akontese tán.
Tama ba segunda parte, ekipa rua nafatin lansa kontra no atake ba malu. Treinadór SLB Efrem Jerónimo komesa kaer kona Karketu nia fallansu iha lina klaran no muda estratejia jogu hodi hamoris hikas SLB nia jogu h rítmu ne’ebé moris.
Ho jogu ne’ebé moris hakbiit liután SLB nia esperansa hodi halo jogu ne’e empata.
Karketu komesa lakon jogu makaas iha minutu 70 to’o 90 resin, nune’e fó biban kedas ba SLB hodi konkista nia mehi. Monu ba iha minutu 70, jogadór Kornelis Portela (11) suta bola halo Karketu nia rede nakdoko no naklees hodi halo jogu ne’e empata ba 1-1.
Ho golu ne’e, tensaun hosi jogu ne’e komesa sa’e makaas tanba Karketu nia mehi tenke hadau tan pontu tolu hodi avansa ba kampiaun, maibé mehi ne’e SLB komesa hakohi tanba golu empata ne’ebé rezulta tenke fahe pontu hanesan.
Alende tensaun entre jogadór sira iha duut matak nia leten, adeptus sira iha tribun leten, sira run-nehan ba malu no hakilar makaas hodi injeta no fó supora ba sira ida-idak nia ekipa favoritu. To’o jogu dolar to’o nia ninin, jogadór sira hisik kosar hodi kaer liman ba malu no adeptus sira fila ba uma ho oin naburut no ho laran susar.
Jornalista : Hortencio Sanchez
Editór : Cancio Ximenes
