DILI, 28 novembru 2021 (TATOLI)–Ekipa Assalam FC susesu iha nia jornada hodi manán adversáriu DIT FC ho skor 3-1, nune’e ekipa ne’e iha direitu absolutamente haksoit sai hosi zona mean.
Jogu entre ekipa rua hala’o iha Estádiu Munisipál Dili, iha domingu lorokaik, iha jogu kontinuasaun Liga Futeból Timor–Leste (LFTL).
Hosi vitória ne’ebé Assalam hetan, fó biban klube ne’e hodi hetan pontu tolu provizóriu iha tabela klasifikasaun liña dalimak ho pontu tolu, enkuantu Lalenok United FC tuur iha liña dahaat ho pontu tolu hanesan, maibé diferente golu, SLB okupa iha pozisaun datoluk ho pontu haat, Ponta Leste okupa iha pozisaun daruak ho pontu neen, Karketu Dili FC okupa pozisaun dahuluk ho pontu hitu no Aitana hela iha pozisaun daneen ho pontu ikus liu, DIT tuur iha liña mean ho pontu zero.
Jogu entre ekipa rua, bainhira akontese iha kampu kuadradu ho kor matak ne’ebé buras iha leten infeta hosi duut ne’ebé mamar, iha oras lorokaik bainhira loromatan atu fahe ona nia roman ho kalan.
Iha minutu dahuluk, hahú ekipa rua lansa kedan kontra no atake tuir tékniku no abilidade ne’ebé iha.
Nune’e, jogu la’o durante minutu barak hosi minutu ida to’o minutu 44, jogu la’o hanesan tanba jogadór ekipa rua halo presaun ba malu ho másimu tebes maibé la rezulta golu ruma.
DIT hala’o jogu ho tensaun ne’ebé a’as, hodi buka meiu hatama golu lalais, maibé esforsu ne’e hela de’it hanesan esforsu tanba la fó golu ruma ba sira.
Assalam hala’o jogu ho presaun maka’as, maski kosar habokon isin lolon, maibé kosar ne’ebé naksulin hosi jogadór nia ropa la saugate tanba hatudu prova iha minutu 45+ jogadór Assalam Martinho Belo (22) lansa golu ida hodi muda rezultadu ba 1-0.
Golu ne’e hanesan golu ikus hodi termina parte dahuluk, tanba laiha tan golu ruma akontese to’o árbitru Pedro Carvalho huu árbitu lian hodi deside parte dahuluk termina.
Hakat ba parte daruak, ekipa rua nafatin hatudu kapasidade jogu tuir tátiku ida-idak hodi lansa ambisaun hatama golu, nune’e bele manán ou impata.
Jogu la’o ho velosidade maka’as, halo jogadór DIT la nonok nafatin hodi hatudu jogu ne’ebé bonitu no la saugate, tanba fó duni rezultadu di’ak tanba iha minutu 53, José Santos (7) responde duni golu ida hodi muda skor ba 1-1, nune’e jogu sai impata.
Hosi golu ne’e, halo ekipa rua tenke serbisu másimu liután iha kampu laran, nune’e sé mak hatama golu hodi lori vitória ba nia ekipa. Esforsu hirak ne’e halo Assalam hetan oportunidade barak liu, nune’e iha minutu 72, Husen Ramos (27) fura tan rede DIT hodi nakfilak rezultadu ba 2-1.
Ikus mai, golu ne’ebé Husen prodúz hanesan presaun boot ba DIT tanba lakon kedas jogu hodi hatudu jogu ne’ebé la unidu iha kampu laran, hanesan minutu sira ba kotuk, ho nune’e Assalam uza kedan oportunidade hodi lansa kontra no atake másimu ba DIT to’o minutu 90+, Martinho Belo lansa tan golu ida hodi muda rezultadu ba 3-1, ne’ebé hakoi kedan mehi DIT ne’ebé antes ne’e deklara hakarak save pontu tolu.
Jornalista : Hortencio Sanchez
Editora : Julia Chatarina
