DILI, 07 dezembru 2021 (TATOLI)—Parlamentu Nasionál, tersa ne’e aprova proposta Orsamentu Jerál Estadu (OJE) 2022 ba Sekretária Estadu Ambiente (SEA) ho montante inisiál $2,433,796 iha espesialidade ho votu a-favór 48, kontra 0 no abstensaun 14.
“Nune’e, Orsamentu Jerál Estadu ba SEA aprova,” Prezidente Parlamentu Nasionál, Deputadu Aniceto Longuinhos Guterres Lopes anunsiu liu hosi plenária.
PN aprova mós proposta númeru 18 ho votu a-favór-56, kontra 0 no abstensaun neen (6) no proposta númeru 19 ho votu a-favór 53, kontra 0 abstensaun sia (9), nune’e proposta rua ne’e pasa.
Proposta númeru 18, adisional aumenta $109,800 atu halo reabilitasaun sentru tratamentu óliu iha Tibar, munisípiu Liquiça.
Kategóra despeza bens no servisu, programa ho kódiku 981 kona-ba protesaun no konservasaun ambiente ho montante $40,000 aumenta tan adisionál $109,800, nune’e programa ida-ne’e sa’e ba $149,800, entaun dotasaun inisiál totál kategoria despeza $1,271.820 no totál finál kategoria despeza $1,381.620.
Justifikasaun sumáriu hosi proponente sira katak, orsamentu ne’e atu halo reabilitasaun ba sentru tratamentu óliu fo’er iha Tibar, nune’e justifikasuan proposta indika sub-programa, atividade no divizaun afetadu hosi alterasaun, ba kódiku konsta livru 2, tuir dokumentu konsta livru 4-A no 4-B.
Iha mós proposta númeru 19, adisionál $210,000, atu hala’o atividade konstrusaun ba estasaun rekoilla residuál óliu iha Betano.
Despeza kapitál dezenvolvimentu, programa ho kódiku 981 kona-ba protesaun no konservasaun ambiente no dotasaun finál $210,000.
Proponente ba proposta ne’e mai hosi Antoninho Bianco ho Olinda Guterres.
Iha OJE 2022, SEA inisiál prevee $2,433,796 ne’ebé aloka ba saláriu vensimentu $ 719,676, bens servisu $1,271,820, kapitál menór $177,300, kapitál dezenvolvimentu laiha, transferénsia públika $265,000, no hosi orsamentu ne’e hodi finansia programa rua (2), sub-porgama ualu (8) no atividade 20.
Programa boa-governasaun no jestaun instituisionál sei gasta $1,234,773 no programa protesaun no konservasaun ambiente sei gasta $1,199,023.
Programa protesaun no konservasaun ambiente ho objetivu médiu prazu ambiente ho protejidu.
Ho nia sub-programa edukasaun ambiental no atividade formasaun ambientál, laboratóriu Ambientál.
Sub-programa konservasaun biodiversidade nia atividade konservasaun sitíu ex-situ, promove modelu uzu sustentavél rekursu biodiversidade, rekuperasaun ka reabilitasaun ekosistema krítiku.
Sub-programa altesaun klimátika no ozonu ho nia atividade kontinua implementa programa avaliasaun vunerabilidade integradu nível suku, aumenta reziliénsia altesaun klimátika liu asaun adaptasaun no mitigasaun, kontrolu Hydro Cloroflouro Carbono (HCFC) no Hydro Flouro Carbono (HFC).
Sub-programa movilizasaun rekursu no investimentu ba merkadu karbonu ho nia atividade kapitalizasaun fundu klimátika verde, implementasaun merkadu karbonu.
Sub-programa fortalesimentu transversalidade ambiental iha setór sira seluk ho nia atividade emisaun lisensa ambientál.
Sub-programa kontrolu polusaun ho atividade kontrola polusaun (hidrosférica, litosférica e atmosférica), sentru tratamentu óleo rezidual.
Portantu, programa boa-governasaun no jestaun instituisionál ho nia sub-programa rua (2) no atividade hitu (7).
Jornalista : Nelson de Sousa
Editór : Cancio Ximenes
