DILI, 10 dezembru 2021 (TATOLI)—Parlamentu Nasionál, sesta ne’e aprova proposta Orsamentu Jerál Estadu (SEJD) 2022 iha espesialidade ho montante $6,583.318 ba Sekretáriu Estadu Juventude no Desportu (SEJD) ho rezultadu votasaun a-favór 44, kontra 0 no abstensaun 21.
“Nune’e Orsamentu Jerál Estadu ba Sekretária Estadu Juventude no Desportu pasa,” Prezidente Parlamentu Nasionál, Deputadu Aniceto Longuinhos Guterres Lopes, deklara liuhosi plenária Parlamentu Naionál.
Iha diskusaun ne’e, deputadu sira iha Parlamentu Nasionál aprova mós proposta númeru 64 propoin $350.000 hodi fó apoiu ba grupu joven iha tinan oin.
Proposta ne’e ho titulu (Servisu/Órgaun) SEJD, kategória despeza transferénsia públika ho programa kódiku 970 igualidade jéneru no inkluzaun sosiál, dotasaun inisiál $3,562.279 alterasaun aumenta $350.000, nune’e dotasaun inisiál sa’e ba $3,912.279.
Justifikasaun orsamentu adisionál ida ne’e presiza aumenta tanba atu hodi fó apoiu ba grupu joven sira liuhosi atividade sira-ne’ebé liga mak ho produtiva sira liu hosi promosaun no auto-empregu, konservasaun ambientál no estabilidade ho pás.
Proponente ba proposta ne’e mak Nelia Menezes, Abel Pires da Silva no Elbina Sousa.
Orsamentu ba tinan 2022 ne’e, sei aloka ba saláriu bensimentu $638.496, bens servisu $1,402.400, transferénsia públika $3.562.279, kapitál menór $600.000 no kapitál dezenvolvimentu $380.143, no orsamentu ne’e sei finansia ba programa rua (2), sub-programa lima (5) no atividade (19).
Programa boa-governasaun no jestaun instituisionál sei gasta $2,351.216 no programa igualidade jéneru no inkluzaun sosiál sei gasta $4,232.102.
Programa igualidade jéneru no inkluzaun sosiál ho nia objetivu médiu prazu joven timorense ho idade 12 to’o 30 dezenvolve sira-nia telentu, dezempeñu no espirítu kompetetivu no grupu joven promove ho envolvimentu iha sosiedade sivíl.
Sub-programa dezenvolvimentu área desportu ho nia atividade jestaun operasionál KRAM, realiza eventu nasionál iha área desportu, dezenvolve kapasidade instituisional iha organizasaun desportiva, dezenvolve rekursu umanu iha área desportu.
Sub-programa dezenvolvimentu iha área juventude ho atividade realiza eventu nasionál iha área juventude, dezenvolvimentu ba kapasidade instituisionál organizasaun juventude, dezenvolve kapasidade rekursu umanu ba joven, insentivu ba empreendedorizmu sosiál ba joventude iha suku.
Sub-programa dezenvolvimentu infraestrutura no fasilita área juventude ho desportu ho atividade konstrusaun kampu multifunsaun iha Taibesi, konstrusaun kampu komunitáriu, konstrusaun no reabilitasaun edifísiu SEJD, reabilitasaun kampu tenis iha UNTL.
Entretantu, programa boa-governasaun no jestaun instituisionál ho nia sub-programa rua (2) no atividade hitu (7).
Jornalista : Nelson de Sousa
Editór : Cancio Ximenes
