DILI, 28 dezembru 2021 (TATOLI)—Ministru Asuntu Kombatente Libertasaun Nasionál (MAKLN), Julio Sarmento da Costa ‘Meta Malik’, konvida Prezidente Repúblika, Francisco Guterres Lú Olo sei prezide selebrasaun loron nasionál éroi iha 31 dezembru tinan ne’e.
Notísia Relevante: Loron Nasionál Éroi: Nicolau Lobato Mak Povu Nia Lider
Goverante ne’e hateten, komisaun organizadora hosi Ministéru Asuntu Kombatente Libertasaun Nasionál (MAKLN), Ministéiru Administrasaun Estatál (MAE) no Kaza Sivíl Prezidensia Repúblika daudaun ne’e hala’o hela preparasaun.
“Iha 31 dezembru sei halo palestra kiik kona-ba loron ne’e no halo mós marsa hosi Palásiu Prezidensiál Nicolau Lobato, Bairru Pite, nia ba iha rotunda estatua Nicolau Lobato iha Comoro. Iha ne’eba mak Prezidente Repúblika sei hato’o diskursu ba komemorasaun loron nasionál éroi,” Ministru Julio da Costa hateten ba jornalista sira hafoin ramata sorumutu ho Xefe Estadu iha Palásiu Prezidesiál Nicolau Lobato, Bairru Pite, Dili, tersa ne’e.
Tuir sekuénsia, nia informa, ajenda iha 30 dezembru tuku 08h00 sei iha misa iha igreja Santo Antonio Motael no hafoin ne’e sei vizita no karii ai-funan ba saudozu sira iha Jardim dos Herois da Patria iha Metinaro.
Loron 31 dezembru nu’udar loron ne’ebé saudozu Nicolau Lobato hakotu nia iis iha kombate, tan ne’e loron ne’e mak Estadu deside sai loron Nasionál Éroi.
Iha loron nasionál éroi ne’e, hanesan loron atu hanoin hikas Saudozu Prezidente Repúblika Demokrátika Timor-Leste (RDTL) no Komandante em Chefe das FALINTIL, Nicolau dos Reis Lobato nia mate iha 31 dezembru 1978, ne’ebé sakrifika-an hodi lori Timor-Leste hetan independénsia ho filozofia moris ‘A Última Bala é a Minha Vitória’.
Nicolau Lobato moris iha 24 maiu 1946 iha Sasatan-oan, Aitara Hun, Soibada, postu administrativu Laclubar, munisípiu Manatuto. Nia hanesan oan dahuluk hosi aman Narcísio Manuel Lobato hosi Leorema, postu administrativu Bazartete, munisípiu Liquiçá no inan Felismina Alves Lobato, hanesan Soibada-oan ne’ebé moris iha Malurucumo ka Macadique, postu administrativu Uatulari, munisípiu Viqueque.
Jornalista : Nelson de Sousa
Editór : Cancio Ximenes
