DILI, 11 janeiru 2022 (TATOLI)—Sekretáriu Estadu Arte no Kultura (SEAK) liuhosi Dirasaun Nasionál Patrimóniu Kulturál (DNPC) sei apoia no halo verifikasaun ba uma lisan hamutuk 120 iha territóriu nasionál.
Notísia Relevante: 2021, SEAK apoia konstrusaun uma lulik 82 iha territóriu nasionál
“Iha segunda (17/01) semana oin ne’e, ekipa verifikasaun hosi SEAK balun sei dezloka ba Baucau, Viqueque, Lospalos, Manatutu, Aileu, Ainaro, Covalima, Manufahi, Liquiça, Ermera, Bobonaro no Suai, sei halo verifikasaun ba uma lisan 120 tanba tanba proposta hamutuk 120 mak SEAK simu tiha ona. Ba RAEOA, ekipa la ba halo verifikasaun tanba iha tinan ne’e laiha proposta,” Diretór Nasionál Patrimóniu Kulturál, Gil Paulino S. Oliveira, hateten ba Agência Tatoli iha nia knar fatin, Avenida Portugál, Díli, tersa ne’e.
Verifikasaun ba uma lisan ne’e bazea ba proposta hosi komunidade ne’ebé mak hatama hosi janeiru to’o sete,nru 2021, nune’e ekipa Dirasaun Nasionál Patrimóniu Kulturál (DNPC) identifika iha 120 proposta uma lisan mak Governu presiza fó apoiu.
Hosi 120 proposta ne’e, iha 20 proposta hosi 2020 ne’ebé pendent no signifika ekipa ba verifika sira seidauk halo, tanba ne’e hosi verifikasaun ne’e ekipa juri sei avalia, observa no verifika iha kampu no hosi rezultadu verifikasaun mak bele determina hira mak tama iha rekejitu hodi prosesu ba apoia.
Nune’e, ba sira-ne’ebé la tama signifika katak Governu labele fó apoia ne’e dalaruma bele to’o 40 to’o 50, no hosi ne’e depende ba rezultadu verifikasaun no bazea ba relatóriu depois enkamiña ba ekipa juri hodi deside katak hira mak atu bele fó apoia.
Iha tinan 2022 ne’e, Sekretária Estadu Arte no Kultura (SEAK) liuhosi Dirasaun Nasionál Patrimóniu Kulturál (DNPC) prevee orsamentu hamutuk rihun $100.
“Tinan ne’e orsamentu kiik tanba uluk iha rihun $200, maibé agora iha rihun $100 de’it, tanba ne’e bazea ba rezultadu verifikasaun mak determina. Tanba, hosi rezultadu mak ita foin identifika katak totál orsamentu ne’e ita kalkuta ba uma lisan hira, hanesan nia prenxe rekejitu ba inaugurasaun, konstrusaun ka reabilitasaun,” nia afirma.
Iha tinan ne’e, ekipa verifikasaun hala’o verifikasaun ba proposta neen (6) ne’ebé SEAK simu no ekipa verifikasaun sira-ne’e kompostu hosi Diretór Jerál Arte no Kultura, Diretór Jerál Administrasaun Finansas, Diretór Aprovizionamentu, Diretór Promosaun das Artes, Diretór Nasionál Patrimóniu Kulturál no Asesór Juridiku Ministériu Ensinu Superiór Siénsia no Kultura no Asesór Planeamentu.
“Ne’ebé, ekipa prinsipál na’in-neen (6) ne’e mak atu deside uma lisan hira mak Governu liuhosi SEAK bele fó apoia,” nia informa.
Jornalista : Nelia Fernandes
Editór : Cancio Ximenes
