DILI, 26 janeiru 2022 (TATOLI)-Organizasaun Filiada Fretilin (OFILIN) deklara fó apoiu tomak ba atuál Prezidente Repúblika, Francisco Guterres ‘Lú Olo’, ne’ebé re-kandidata an ba Prezidente Repúblika ba períodu 2022-2027 hodi kompete iha eleisaun prezidensiál 2022.
Notísia Relevante: Re-kandidata an: PR Lú Olo la rezigna an to’o mandatu ramata
Porta Voz Organizasaun Filiada Fretilin (OFILIN), Frandix Crisman, deklara pozisaun OFILIN kona-ba kandidatu Xefe Estadu 2022-2027 ho lema OFILIN “Ezerse nia direitu síviku liuhosi nia intervensaun votu”.
“OFILN apoia kandidatura ida-ne’ebé mai hosi partidu FRETILIN no OFILIN kumpre desizaun diretiva partidu FRETILIN nian hodi hatuur étika polítika ida onestu no seriedade tuir konviksaun polítika OFILIN nian rasik,” Frandix Crisman deklara liu hosi konferénsia imprensa ba jornalista iha salaun Luz Clarita, Dili, kuarta ne’e.
Nia apela ba estrutura tomak OFILIN nian hosi nasional to’o ba sub-nasionál no baze atu mobiliza rekursu tomak organizasaun nian hodi apoia totál no kompleta ba kandidatura Francisco Guterres Lú Olo iha loron eleisaun ne’ebé tuir kalendáriu STAE niaan sei hala’o iha 19 marsu 2022.
Tanba ne’e, OFILIN reafirma nia apoiu tomak ba kandidatura Francisco Guterres Lú Ulo ba Prezidente Repúblika ba periódu 2022-20277
Tuir konstituisaun artigu 76 katak Prezidente Repúblika sei hili tuir sufragiu universál, livre, diretu, sekretu no pesoál liuhosi dalan eleisaun nian. Eleisaun fó mai ita direitu síviku oinsá atu pronúnsia ita-nia intensaun votu ba ema ruma ba kargu ruma Estadu nian. Tuir dalan demokrásia representativa, povu delega nia ukun ba iha ema-ne’ebé nia fiar atu ukun hodi hametin demokrásia no Estadu diretu demokrátiku.
Iha artigu 74 katak, Prezidente Repúblika hanesan Xefe Estadu, nu’udar mós simbolu no garante Independensia nasionál no unidade Estadu nian no funsionamentu regular instituisaun demokrátika sira-nian no mós Prezidente Repúblika iha mós knar nu’udár Komandante Supremu Forsa Amada nian.
Atu lori Pesoa Jurídika ida hodi garante papél Xefe Estadu ne’ebé hatuur ona iha artigu 74 konstituisaun ho nia definisaun sira no ho baze dekretu kalendáriu eleisaun prezidensiál ne’ ebé sei akontese iha 19 marsu 2022, mak ohin OFILIN nu’udar Organizasaun Filiada Partidu Frente Revolusionária Timor-Leste Indepedente (FRETILIN) hakarak hato’o ba kuadru OFILIN hosi nivél nasionál, sub-nasionál to’o baze no ba povu katak, OFILIN respeita kandidatu hotu-hotu nia vontade polítika manifesta iha lansamentu aprezentasaun kandidatura hirak ne’e nu’udar vontade Timor-oan hotu nian.
“Maibé nu’udar organizasaun masa ida ne’ebé mai husi organizasaun rezisténsia hanesan OJETIL, OPJLATIL, FITUN, ASUWAIN LEMORAI, Organizasaun Rezisténcia Hametin FRETILIN (ORHF ), Movimentu Jerasaun Kontinuador FRETILIN (MOJEKOF), Movimentu Juventude Rezisténsia Libertasaun Nasionál (MJRLN) no Juventude Luta ba Dezenvolvimentu Timor-Leste (JULUDENTIL), iha nia pozisaun rasik hodi apoiu destinu nasaun no Estadu liu hosi apoia ne’ebé responsavel fó ba kandidatu ba Prezidente Repúblika periódu 2022-2027, ne’ebé mós hatudu nia neon badinas no neon brani atu hasees rai ida-ne’e husi krize oioin no liu-liu, kombate korupsaun,” nia dehan.
Tanba ne’e, hafoin observa tetu no sukat kandidatu sira hotu-hotu ne’ebé ofisialmente aprezenta sira-nia kanidadatura, lori OFILIN hosi nivél nasionál sub-nasionál to’o iha suku no aldeia sira hotu hodi deklara OFILIN apresia no respeita timor-oan hotu ne’ebé iha vontade tuir lejitimidade demokrátika hodi kandidata an ba Prezidente Repúblika períodu 2022-2027.
“OFILIN totalmente fó apoiu ba Prezidente ne’ebé hatuur misaun Xefe Estadu ho lolos tuir espiritu no letra ne’ ebé hatur iha artigu 74 iha konstituisaun, nune’e OFILIN apoia Prezidente ida-ne’ ebé iha nia desizaun polítika demokrátika rasik, tuir loos konstituisaun nian no sei la halo tuir orden informál ruma.
OFILIN apoia kandidatu ida-ne’ebé kumpre regra administrativa no rekezitu formál legál sira no juridikamente elejivel nu’udar kandidatu ba Prezidente Repúblika no apoia kandidatura ida ne’ebé iha kredibilidade no integridede di’ak no iha kompromisu no deteminasaun kontra korrupsaun iha Timor-Leste durante nia mandatu.
Nia apela ba membru sira atu assegura nafatin pás, estabiliade no seguransa iha ema ida-idak
nia hela fatin nu’udar responsabilidade no jestu ne’ebé aas hodi fó garantia ba realizasaun festa demokrátika ida-ne’e.
Prezidente OFELIN, José Manuel ‘Nakfila’, hateten razaun apoiu Lú Olo tanba povu Timor-Leste tomak kuiñese perfil atual PR Lú Olo nian ho simplisidade durante tinan lima salva Timor-Leste hosi krize boot rua ho nia dezisaun Estadu emerjénsia hasoru COVID-19 hodi salva povu nia vida nomós hakruuk de’it ba konstituisaun, lei no konsiénsia rasik tuir konstituisaun haruka.
Hatán kona-ba Lere Anan Timur ne’ebé hanesan membru CFF deklara kandidata an mós ba PR hodi kompete iha eleisaun, nia dehan, sira mesak Fretilin maibé dixiplina partidu no organizasaun mak orienta atu la’o.
“Ami OFELIN haree ba maun Lú Olo ho Lere Anan Timur mesak kamarada hotu iha Fretilin maibé dixiplina partidu no organizasaun mak orienta ami la’o ne’ebé sei la hatun ida no la hasai ida,” nia dehan.
Hanesan organizaun masa hosi Fretilin nian, iha dever tomak bainhira nia kandidatu prontu hasoru no garante kandidatu Lú Olo sei manan iha eleisaun prezidensiál to’o de’it primeira volta tanba preparasaun másimu.
Notísia Relevante: Tribunál Rekursu seidauk simu lista kandidatu Prezidente Repúblika
Jornalista : Nelson de Sousa
Editór : Cancio Ximenes
