DILI, 28 janeiru 2022 (TATOLI)—Sekretariadu Tékniku Adminitrasaun Eleitorál (STAE), fó sai rezultadu sinkronizasaun dadus eleitór iha territóriu nasionál inklui diáspora hamutuk 864.754.
“Sinkronizasaun ba dadus eleitór iha nasionál no internasionál 864.754, feto hamutuk 416.212 no mane hamutuk 448.542. Hosi númeru ne’e ita mós distribui ona ba territóriu nasionál hodi taka sai nune’e eleitór ida-idak bele konfirma,” Diretór Sekretáriu T’eknika Administrasaun Estatál (STAE), Acilino Manuel Branco, ba Agência TATOLI, iha nia knaar fatin Caicoli.
Dadus hirak-ne’e bele dehan sei provizóriu hela tanba STAE sei taka iha munisípiu sira depois sei halo tan espozisaun ba dadus iha postu no suku sira.
“Ita sei mai halo korresaun depois fó sai rezultadu finál iha fevereiru ne’e,” nia informa.
Hosi eleitór 864.754 ne’e kompostu hosi munisípiu Aileu 33.859, Ainaro 45.949, Baucau 96.875, Bobonaro 71.371, Covalima 47.965, Dili 191.423, Ermera 83.213, Lautém 48.665, Liquiça 51.160, Manatuto 35.926, Manufahi 41.012, RAEOA 51.653 no munisípiu Viqueque 58.564.
Dadus eleitór iha diaspora kompostu hosi eleitór sira iha Austrália hamutuk 1.487, Korea do Súl 1.277, Irlandia 1.264, Portugal 857 no Reinu Unidu 2.234.
Jornalista : Osória Marques
Editór : Cancio Ximenes
