Hosi:
Quintiliano A. Belo
Timor-Leste nia Eleisaun Prezidente sei akontese iha loron 19 fulan-marsu tinan ne’e tuir dekretu prezidente númeru 2/2022. Eleisaun prezidente tinan ne’e hanesan eleisaun dalimak depois Timor-Leste restaura independensia iha maiu 2002.
Istória hatudu númeru kandidatu ne’ebé atu kompete iha Elprez kada tinan lima aumenta. Kandidatu hirak ne’e barak mós kompete ona (oin tuan) no barak nu’udar oin foun ka nunka kompete. Hatudu, konstituisaun RDTL fó liberdade ba sidadaun atu kompete no sai-nain ba palásiu prezidente, naran katak prenxe rekizitu tuir lei-inan artigu 75 hakerek.
K-RDTL hateten rekezitu prinsipál ba kada kandidatu atu prenxe mak hetan proposta husi sidadaun mínimu rihun lima no verifikadu husi Tribunál Supremu Justisa Timor-Leste. Mesmu nune’e, atan ha’u hakarak hateten eleisaun ba ema númeru um iha RDTL la’ós mamar no la’ós tiru berlindus. Tanbasá? Tanba sosiedade Timor-Leste nia sivismu no maturidade durante ukun-án demokrátiku tebes. Ho nune’e, kandidatu ne’ebé atu manán tenke iha kapasidade forte hodi konvense votante sira, tanba laiha votante ne’ebé vota bainhira iha opresaun nia laran. Katak terror no money politic (polítika osan) sei laiha valór ou sei saugati de’it durante kampaña no iha loron eleisaun.
Ita hotu akompaña iha mídia sira katak, kuaze sidadaun nain 10 resin mak rejistu iha tribunál supremu justisa-nian to’o loron 4 fulan-fevereiru 2022. Sidadaun hirak ne’e, barak liu avansa independente no balun ho forsa partidu-nian, maibé husi forsa partidu no independente, kandidatu hotu iha oportunidade ne’ebé hanesan atu influénsia votante sira iha baze to’o tempu determinadu hodi manán absoluta iha primeira ronde no bele mos avansa ba segunda volta eleisaun.
Tanba ne’e, tuir atan ha’u nia obrservasaun, bainhira otas tuan sira sei dun no dada malun hodi hateten ha’u de’it mak loos liu no seluk la-loos hanesan argumentu asaltadór no disolve parlamentu, maka otas tuan sira nia argumentu hirak ne’e sai hanesan lisaun ladun di’ak atu otas foun sira banati tuir iha loron ikus. Biar nune’e argumentu hirak ne’e konsumadu katak, Prezidente atuál Lú Olo (LO) identiku ho asaltadór no José Ramos Horta (JRH) identiku ho disolve PN. Tanba ne’e fatin própriu hodi julga argumentu rua maka eleisaun prezidente. Signifika argumentu nee loos ka sala 19 marsu mak tempu determinante.
Tópiku rua ne’e sai nu’udar tópiku manas iha mídia sosiál no mídia televisaun sira ikus-ikus ne’e. Eleitór sira mos hatene, eventu demokráriku hodi hakat ba palásiu prezidente sei akontese duni, maske Timor-Leste enfrenta surtu Covid 19 ho variante omicron ne’ebé sa’e ba bei-beik kada loron. Eventu demokrátiku sei rame no furak bainhira ha’u rona eleitór matan-dook sira dehan eleisaun nia nain iha ona no posiblidade bo’ot bele manán de’it iha primeira volta ho absoluta.
Razaun simples ne’ebé matan-dook sira dehan mak entre kandidatu hirak ne’e, kandidatu LO (prezidente atuál) nia proponente 125.000 (rihun atus ida rua nolu resin lima). Kandidatu JRH (Premiadu Nobel Dame no eis-Prezidente) nia proponenti kuaze pasta/folder neen mesmu númeru la klaru no kandidatu sira seluk menus husi rihun rua nolu (20.000) asinatura.
Razaun seluk mak kandidatu nain rua iha ona esperiénsia lakon no iha mos referénsia midar no moruk durante sai nain ba palásiu prezidente. Tanba ne’e, tuir matan-dook sira hateten LO no JRH mak kandidatu forte atu sai Xefe Estadu períodu 2022-2027 ho realidade sira hanesan:
- JRH kandidata-án ona ba daruak no konsege sai nu’udar Prezidente Repúblika durante tinan lima, maske manán ho segunda volta entre 2007-2012.
- LO kandidata-án ba datoluk no konsege sai Prezidente Repúblika durante tinan lima ne’ebé manán absolutamentu iha primeira volta entre 2017-2022.
- JRH mos konsenge simu lakon absoluta iha nia kanditaura entre 2012-2017.
- LO nunka simu lakon absoluta maibé konsege lakon iha segunda ronde dala-rua tuir-tuir malu entre 2007-2012 no 2012-2017.
Razaun simples sira iha leten lori ha’u ba konkluzaun, karik argumentu asaltadór no rekomendasaun disolve parlamentu ne’e la loos maka JRH lalika kolen atu ba segunda volta, tanba LO mak sei manán iha premeira volta ho absoluta. Karik argumentu asaltadór no rekomendasaun disolve parlamentu ne’e mak loos maka JRH sei iha oportunidade ba segunda volta hamutuk ho LO hodi provas no teste kualker aktu ne’ebé prezidente atuál halo ona no prezidente foun sei halo iha futuru sei válidu politikamente no moralmente ba Estadu.
Ikus liu, nu’udar otas nurak ne’ebé moris iha tinan 80, hakarak enkoraza no fanu eleitór sira hotu, tantu foun no tuan katak eleisaun prezidente 2022 nu’udar prova ba ita hotu atu hametin liután ita nia konstituisaun no sai Nasaun ida riku, forte no seguru. Realidade saida de’it mak akontese hanesan asaun ka dezisaun depois eleitu nu’udar Prezidente Repúblika finál no indiskutivel, tanba autoridade no lejitimidade tomak ita hotu mak oferese liuhusi votasaun iha kada tinan lima.
Artigu ne’e nu’udar opiniaun pessoál. Tanba ne’e la’ós obrigatório atu konsumu.
