Timor-Leste aprezenta kandidatura ba ONU sai membru Konsellu Direitu Umanu

DILI, 09 janeiru 2022 (TATOLI)— Ministru Justisa (MJ), Manuel Cárceres, informa Estadu Timor-Leste aprezenta ona nia-lista kandidatura ba Organizasaun Nasaun Unida (ONU) atu sai membru ba Konsellu Direitu Umanu.
Lista kandidatura ne’e aprezenta ho bazia ba desizaun Konsellu Ministru (KM), iha fulan-abríl 2021, ne’ebé aprova projetu Rezolusaun Governu kona-ba aprovasaun ba kandidatura Timor-Leste hanesan membru Konsellu Direitu Umanu hosi Organizasaun Nasaun Unida (ONU) ba períodu tinan 2024-2026.
“Ita haruka ona kandidatura atu sai membru ba Konsellu Direitu Umanu iha Nasaun Unida, ne’ebé sira halo hela ponderasaun, nune’e tinan oin ita tenke serbisu makas atubele hetan apoia nasaun barak liuliu nasaun Komunidade lian Portugés (CPLP,sigla portugés). Maibé ita tenke serbisu makas tan atubele hetan apoia hodi ba tuur ka sai membru iha ne’ebá,” Ministru Manuel, hateten ba jornalista-sira iha Palasiu Governu-Dili, kuarta ne’e.
Nia dehan, nasaun sira iha CPLP no iha Azia mós fó apoia ba Estadu Timor-Leste atu sai membru ba Konsellu Direitu Umanu.
Nune’e, Estadu Timor-Leste aprezenta ona lista kandidatura iha Genebra ONU, iha 27 janeiru liubá hosi Ministru Justisa Manuel Cárceres.
“Kandidatura ne’ebé ita aprezenta ne’e lao’s ema ida ka rua maibé ita aprezenta Estadu ida ne’e tanba Estadu ne’e mak atu sai hanesan membru. Nune’e tinan oin mak foin halo ita nia kampaña karik ita ba tuur iha ne’ebá hahú 2024-2027,” nia afirma.
Daudaun, Konsellu Direitu Umanu iha membru hamutuk 47, ne’ebé eleitu liuhosi maioria Estadu Asembleia Jerál ONU ba mandatu tinan tolu no país seluk mantein estatutu hanesan observadór.
Distribuisaun asentu sira sei halo tuir aprezentasaun jeográfika ekuitativa grupu 13 hosi país Afrikanu, grupu 13 hosi país Aziátiku, grupu hitu hosi país Leste Europeu, grupu ualu hosi país Amérika Latina no hosi Karaíbas, inklui grupu hitu husi país sira Europa Osidentál no sira seluk.
Notísia relevante: KM aprova kandidatura Timor-Leste hanesan membru Konsellu Direitu Umanu
Jornalista: Hortencio Sanchez
Editór : Florencio Miranda Ximenes

