DILI, 14 fevereiru 2022 (TATOLI)—Reprezentante povu iha uma fukun Parlamentu Nasionál husu Governu atu identifika estrada ne’ebé kondisaun ladi’ak iha territóriu hodi normaliza, liu-liu estrada ne’ebé liga direta ba sentru votasaun iha eleisaun prezidensiál ne’ebé sei realiza iha 19 marsu 2022 ne’e.
“Hanoin hanesan informasaun ne’ebé iha sentru votasaun sei barak maibé fatin barak estrada asesu ba susar. Se Ministériu Obra Públika (MOP) ho Institutu Jestaun Ekipamentu (IGE, sigla portugés) la halo intervensaun ka normalizasaun mak sei difikulta STAE atu mobiliza materiál sensetivu sira iha eleisaun prezidensiál ne’ebé sei realiza iha 19 marsu. Nune’e, fó hanoin ba Governu atu tau atensaun,” Deputadu CNRT, Arão Noe, levanta iha plenária Parlamentu Nasionál, segunda ne’e.
Tanba tuir Arão, iha semana kotuk hala’o viajen ba nia munisípiu rasik Manufahi iha suku balun observa sei iha mós sentru votasaun maibé daudaun iha tempu udan sei makaas, nune’e dalan susar tebes atu asesu entaun husu ba Governu liu-liu IGE, I.P presiza atu normaliza normaliza.
Deputadu Fretilin, Dario Maderia, husu Ministériu Administrasaun Estatál (MAE) koordena ho Ministériu Obra Públika orienta Institutu Jestaun Ekipamentu (IJE) atu identifika dalan ne’ebé liga sentru votasaun ladi’ak liu-liu área izoladu sira bele normaliza, nune’e fasilita servisu STAE no movimentu komunidade iha tempu eleisaun.
Tanba, nia dehan, observasaun ne’ebé iha semana kotuk bainhira hala’o viajen ba munisípiu Viquque nota katak iha suku Bahatata hosi postu Watucabau Villa nu’udar área izoladu labele asesu ba estrada.
“Susar liu mak iha tempu udan daudaun ne’e labele asesu ba estrada motor ho karreta para iha suku Afaloicai hafoin ba iha suku Bahatata. No, foin daudaun iha fim de semana, ha’u konsege to’o iha ne’ebá, karreta tama mai nia roda pipu sira haksoit sai hotu tanba dalan ladi’ak, hodi hein kle’ur mai fali lori roda dezerva iha postu Watucarbou Vila mak foti,” nia dehan.
Prezidente Parlamentu Nasionál, Deputadu Aniceto Longuinhos Guterres Lopes, konsidera presiza normaliza lalais dalan tanba ita agora iha preparasaun eleisaun prezidensiál hanesan kampaña eleitorál to’o ba iha data eleisaun iha 19 marsu.
Hatán ba preokupasaun ne’e, reprezenta Governu liuhosi Ministru ba Asuntu Parlamentár no Komunikasaun Sosiál (MAPKOMS), Francisco Maretins da Costa Pereira Jeronimo, hateten sei hato’o asuntu ne’e ba ministéiru tutela.
Jornalista : Nelson de Sousa
Editór : Cancio Ximenes
