Top

Embaixador Portugal despede PR Lú Olo

Embaixadór Portugal iha Timor-Leste, José Pedro Machado Viera, despede Prezidente Republika, Francisco Guterres Lú Olo. Imajen/Mídia PR.

DILI, 14 fevereiru 2022 (TATOLI)—Embaixadór Portugal iha Timor-Leste, José Pedro Machado Viera, segunda ne’e hala’o sorumutu hodi despe Prezidente Republika, Francisco Guterres Lú Olo, tanba nia hala’o misaun durante tinan haat iha Timor-Leste to’o ona rohan.

“Objetivu hosi enkontru ne’e simples hodi despede ho Prezidente Repúblika tanba ha’u-nia misaun kumpleta ona tinan haat,” José Pedro Machado Viera hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairu Pite, Dili.

Nia parte sente previlejiu boot ida no agradese bele hala’o knaar iha Timor-Leste ho di’ak to’o misaun termina.

Embaixadór Portugal ne’e hateten, relasaun Timor-Leste ho Portugal hanesan maun ho alin ne’ebé la’ós de’it partilla pasadu komun maibé importante liu ida-ne’e partilla mós valór sira komun hanesan Estadu direitu demokrátiku.

Prezidente Repúblika no embasador José Pedro Machado Viera fiar katak relasaun forte entre nasaun rua sei kontinua metin nafatin ba futuru hodi realiza medida no progresu sira konkretu liuhosi troka esperiénsia.

Xefe Estadu agradese servisu sira-ne’ebé Embaixadór José Pedro Machado Viera hala’o hodi kria kooperasaun iha área oioin no hametin liután relasaun entre Portugal ho Timor-Leste, PR Lú Olo mós agradese ba apoiu tomak ne’ebé Governu Portugal fó durante ne’e.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!