Top

Governu presiza konstrui moru protesaun ba mota Guicho-Lisadila

Ekipa Intituto Gestaun Ekipamentu hamos hela tahu no ai sira iha mota Maloa impaktu husi udan horseik lokraik, kuarta 6 Janeiru 2021.Imajen Tatoli/Antonio Goncalves

DILI, 14 fevereiru 2022 (TATOLI)—Deputada Maria Anabela Savio, hateten tuir   relatóriu fiskalizasaun komisaun E trata asuntu infraestrutura ne’ebé hala’o iha loron 22-25 setembru 2021, katak Governu presiza konstrui moru protesaun ba mota iha suku Guicho no Lisadila hosi postu administrativu Maubara, munisípiu Liquiça.

“Haree ba estragu ne’ebé rezulta hosi mota Loes, komunidade rekomenda ba Governu atu bele halo moru protesaun iha mota Loes parte leten, atu nune’e bele satán hela komunidade sira-nia hela fatin no kintál hosi mota boot,” Deputada relatór, Maria Anabela, lee relatóriu fiskalizasaun iha plenária Parlamentu Nasionál, segunda ne’e

Tuir relaóriu komisaun E ne’ebé Agéncia Tatoli asesu, katak vizita ba komunidade suku Guicho no Lisadila hatán ba karta pedidu hosi komunidade nian hodi haree direta estragu hosi mota ne’ebé sobu no estraga tiha komunidade balun nia uma no to’os.

Iha vizita ida-ne’e komunidade hosi suku Guico no Lisadila agradese tebes no haksolok tanba delegasaun hosi Komisaun E bele to’o iha komunidade sira-nia fatin hodi haree direta problema ne’ebé sira enfrenta.

Bibán ne’e lori komunidade suku rua nia autoridade lokál hosi suku hato’o preokupasaun hosi komunidade tanba kada tinan iha suku refere sempre mosu inundasaun hodi rezulta estragu ba komunidade nia uma no to’os.

Suku rua ne’e sai fatin potensial ba área agrikultura desde tempu okupasaun Indonézia nian to’o agora hodi halo to’os hodi kuda modo no aifuan.

Suku Guicho no Lisadila iha totál uma-kain hamutuk 100-resin no inundasaun konsege estraga tiha uma no to’os uma-kain hamutuk 87.

Hanesan iha tinan 2017, iha tempu udan boot mota konsege estraga xefe família na’in-79 nia uma inklui kioske ida no igreja iha suku Lisadila, no iha 2019 mós akontesimentu ne’ebé hanesan mota lori tan komunidade nia uma no to’os.

Tinan hirak liu ba Institutu Jestaun Ekipamentu, Institutu Públiku (IGE, I.P, siglá poretugés) konsege normaliza tiha mota maibé liu tiha semana ida akontese fali udan boot no bee-mota kontinua estraga komunidade sira to’os.

Nune’e iha 2020 komunidade hasoru tiha ona membru Govemu sira hodi bele atende sira-nia preokupasaun maibé to’o agora seidauk iha resposta.

Tuir autoridade lokál sira katak iha tinan liu ba mós Govemu konsege halo tiha ona gabiaun iha mota Loes maibé realidade la rezolve inundasaun durante tempu udan.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!