MOJEKOF Laclo hato’o komunidade nia preokupasaun ba PR

DILI, 18 fevereiru 2022 (TATOLI)—Movimentu Juventude Kontinuadór Futuru (MOJEKOF) hosi postu administrativu Laclo, munisípiu Manatuto, sesta ne’e halo audiénsia ho Prezidente Repúblika, Francisco Guterres Lú Olo, hodi hato’o difikuldade ne’ebé komunidade hasoru iha siklone tropikál seroja i04 abril 2021 ne’ebé mosu dezastre naturál hodi estraga komunidade nia uma, to’os no natár.
“Ohin ami enkontru ho Prezidente Repúblika hato’o preokupasaun ne’ebé agora iha postu Laclo liliu ba kalamidade ne’ebé akontese iha 04 abríl to’o agora halo povu iha Laclo halerik hela kuaze maiória natár no to’os ho uma fatin seidauk iha rekuperasaun ruma hosi Governu,” Reprezentante komunidade Laclo, Vitorino da Costa Oliveira, hateten ba jornalista sira hafoin ramata sorumutu ho Xefe Estadu iha Palásiu Prezidensiál Nicolau Lobato, Bairru Pite, Dili, sesta ne’e.
Nia relata, komunidade nia natar ne’ebé hetan estragu iha área Laclo tomak ne’ebé hahú hosi baliza besik entre munisípiu Aileu no Manatuto iha ektare 580 ne’ebé hetan sedimentasaun rai ka rai-henek taka tomak.
Iha natár ho ektare hitu mak la afeta ba sedimentasaun maibé labele funsiona tanba mota boot estraga mós irrigasaun sira iha Laclo hanesan Mabelan, Labanwa’i, Bahaliu no Maleluli.
Dezastre naturál refere, nia dehan, estraga mós komunidade nia uma hamutuk 158 hosi aldeia Labubu, suku Lakumesa no uma 69 iha aldeia Hahilakor, suku Uma Naruk.
“Dezde 15 abríl tinan kotuk hetan tiha apoiu lona no apoiu sira seluk maibé to’o agora ba apoiu rekuperasaun seidauk, tanba família hosi aldeia rua ninia hela fatin labele utiliza tan, liuliu agora iha tempu udan la seguru,” nia dehan.
Preokupasaun hirak ne’e hato’o ona ba parte Governu maibé daudaun ne’e seidauk iha resposta ruma.
MOJEKOF mós husu Governu nia apoiu ba inisiativa joventude iha área pekuária, ortikultura no atividade sira seluk, tanba daudaun ne’e paradu hela tanba afeta hosi dezastre naturál.
Durante sorumutu ne’e, Prezidente Repúblika rejista hela no sei hato’o ba Governuatu bele tau atensaun ba preokupasaun refere.
Jornalista : Nelson de Sousa
Editór : Cancio Ximenes

