DILI, 24 fevereiru 2022 (TATOLI)—Durante halo inspesaun iha estabelesimentu komersiál, Autoridade Inspesaun no Fiskalizasaun Atividade Ekonomia no Satintária (AIFAESA) identifika katak iha sasán nesesidade bázika balun sa’e oituan maibé konsidera normál.
Tuir dekretu-lei númeru 29/2011 kona-ba prezu justu, bainhira negosiante sira fa’an sasán la liu hosi 10-15% ne’e tama kategoria normál.
“Durante ami halo inspesaun, folin sasán hanesan mina han, foos no seluk tan sa’e oituan, tanba impaktu COVID-19 no transportasaun ró mínimu halo folin sa’e hahú hosi ninia fábrika, maibé sira fa’an la liu barak hosi presu normál,” Diretór Departamentu Asuntu Jurídiku Koordenasaun AIFAESA, hateten ba Agência TATOLI, iha ninia knaar fatin, Matadouro, kinta ne’e.
Notísia relevante: AIFAESA seidauk simu keixa hosi komunidade relasiona folin sasán sa’e
Aleinde ne’e, parte AIFAESA durante ne’e seidauk simu keixa hosi públiku relasiona ho folin sasán nesesidade bázika iha merkadu sa’e.
“Relasiona ho komunidade nia preokupasaun ho folin sasán sa’e iha merkadu, liuliu mina han ho marka Bimoli no seluk tan inklui nesesidade seluk no materiál konstrusaun, ami seidauk simu keixa hosi komunidade, maibé durante ami halo inspesaun folin sasán normál,” nia akresenta.
Ba kestaun ne’e, Diretór ne’e husu ba negosiante sira atu labele manipula folin sasán nesesidade bázika tanba bainhira ekipa identifika sei hetan sansaun administrativa no legál.
Iha tinan 2022, AIFAESA halo inspesaun ba estabelesimentu hamutuk 209 no hosi númeru ne’e identifika komete regularidade hamutuk 185, irregularidade hamutuk haat no infrasaun hamutuk 24.
“Sira ne’ebé komete ba irregularidade kompostu hosi sira ne’ebé fa’an sasán, lisensiamentu, atividade laduun ijiene, prazu produtu no tabaku elísitu sira,” nia informa.
Nune’e, sira ne’ebé komete irregularidade, AIFAESA fó ona atensaun no kontinua prosesa ba Ministériu Públiku.
Jornalista : Arminda Fonseca
Editora : Julia Chatarina
