Top

Deputadu Fretilin ho PLP ezije Governu buka tuir Nicolau Lobato nia-ruin

Plenaria Parlamentu Nasional. Imajen Tatoli Antonio Goncalves.

DILI, 28 fevereiru 2022 (TATOLI)—Deputadu Frente Revolusionária Timor-Leste Independente (Fretilin) ho Partidu Libertasaun Populár (PLP) kontinua ezije ba Governu atu buka tuir Saudozu Nicolau Lobato ho saudozu sira seluk nia ruin ne’ebé mate iha prosesu luta ba libertasaun nasionál.

Notísia Relevante: Embaixadór Indonézia sei esforsu buka Saudozu Nicolau Lobato nia ruin

Deputadu Fretilin, David Dias Ximenes ‘Mandati’, husu Ministériu ba Asuntu Kombantente Libertasaun Nasionál (MAKLN) no Ministériu Negósiu Estranjeiru no Kooperasaun (MNEK) atu oinsá buka komunikasaun nafatin ho Governu Indonézia hodi bele fasilita buka restu mortál.

“Tan ne’e kontinua husu Governu atu buka tuir ruin saudozu sira-nian ne’ebé seidauk hetan to’o agora”, nia levanta iha plenária, segunda ne’e.

Deputada Fretilin, Elena Martins, hateten dalabarak ona husu maibé laiha solusaun to’o agora nune’e Governu presiza toma ho sériu oinsá halo esforsu hodi buka tuir ruin saudozu sira-nian.

Antes ne’e, Deputadu PLP, Noé de Jesus ‘Buka Tuir’, hateten iha loron 03 fulan marsu ne’e sei komemora loron nasionál veteranu maibé restu mortál saudozu sira-nian hanesan Nicolau Lobato ho sira seluk seidauk hetan.

Hatán ba kestaun ne’e, reprezenta Governu liuhosi Ministru ba Asuntu Parlamentár no Komunikasaun Sosiál (MAPKOMS), Francisco Jerónimu, hateten asuntu refere antes ne’e hato’o ona ba ministériu relevante maibé seidauk iha resposta ruma, nune’e ho preokupasaun deputadu sira-nian sei kontinua enkamina.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!