PNTL Bobonaro la tolera sidadaun ne’ebé kria instabilidade iha eleisaun
BOBONARO, 14 marsu 2022 (TATOLI) – Komandu Polísia Nasionál Timor-leste (PNTL) Munisípiu Bobonaro, sei la tolera kualkér sidadaun ne’ebé mak hakarak kria instablidade iha durante eleisaun prezidensial ne’ebé sei realiza iha loron 19 fulan-marsu tinan 2022.
“Ha’u hanoin sira-ne’ebé atu kria instablidade iha fatin sentru votasaun sira ita la tolera, tanba ita iha ekipa movel sei mantein iha komandu no sei destaka iha postu administrativu sira,” Komandante PNTL Munisípiu Bobonaro, Superintendente Antoninho Mauluta, ko’alia iha Maliana, segunada ne’e.
Bazea ba planu operasaun komandu munisípiu Bobonaro katak sei koloka ekipa tolu kompostu hosi parte postu administrativu Lolotoe no Bobonaro sei destaka ekipa ida iha suku Oe-Leu nian.
Iha parte postu administrativu Atabae no Balibo sei destaka ekipa ida Iha Balibo no Cailaco nia ekipa ida hosi Komando munisípiu mak sei kobre atu halo vijilánsia másima bainhira akontese krime eleitorál iha sentru votasaun sira.
Komandante ne’e dehan, polísia mesak sei labele garante establidade totál tanba ne’e atu asegura prosesu eleisaun ne’e bele la’o ho susesu, presiza mós kontribuisaun hosi komunidade no entidade sira seluk hanesan grupu arte-marsiál no rituál sira.
“Ita husu ba ema hotu-hotu, liuliu joven sira labele kria instabilidade iha sentru votasaun, ita mós aviza tiha ona katak bainhira akontese situasaun ruma, ita la tolera no ita sei foti asaun tuir kna’ar PNTL nian,” nia afirma.
Totál membru efetivu ne’ebé preparadu atu asegura materiál eleisaun hamutuk na’in-169. Hosi númeru ne’e sei koloka ba sentru votasaun 130 no estasaun votu hamutuk 150 iha postu administrativu Atabae, Balibo, Cailaco, Maliana, Bobonaro no Lolotoe.
“Ita iha totál membru efetivu na’in-144 no ita hetan apoia membru balu tán hosi komandu na’in- 25 mak ita sei junta hamutuk hodi koloka ba iha sentru votasaun balun,” nia katak.
Nia dehan, membru hirak-ne’e sei koloka ema na’in-rua iha área risku sira hanesan iha administrativu Bobonaro iha suku Sibuni no Molop.
Hosi parte postu administrativu Lolotoe nian mak hanesan Anapal, Omelai, Guda no Deudet. Postu administrativu Cailaco nia área Poerema, tanba áea refere labele asesu ba estrada.
Jornalista : Sérgio da Cruz
Editór : Evaristo Soares Martins
