Lista pasiente la aprezenta ba STAE, votasaun movel la akontese iha HNGV
DILI, 15 marsu 2022 (TATOLI)—Diretór Jerál Sekretariadu Tékniku Administrasaun (STAE), Acilino Manuel Branco, informa responsável Hospitál Nasionál Guido Valadares (HNGV-sigla portugés) la aprezenta lista pasiente ba STAE mak votasaun movel sei la akontese iha ospitál refere.
“Se laiha lista pasiente ba STAE mak votasaun movel sei la akontese iha HNGV,” Acilino hateten ba Agência TATOLI iha nia knar fatin Caicoli, Dili, tersa ne’e.
Tanba, tuir nia, STAE sei la atende hodi la realiza votasaun móvel ba pesoal saúde sira no funsionáriu ospitál nasionál entaun sira tenke ba vota fali iha ida-idak nia suku ne’ebé sira hela bá.
“Dadus ne’ebé mak ita asesu iha loron 7 marsu 2022 ne’e atu submete lista pasiente maibé HNGV mak la aprezenta lista pasiente no sira aprezenta mak lista doutór, médiku no funsionáriu HNGV nian kuaze 373. Ho ne’e, ha’u orienta fila-fali atu parte responsável hosi HNGV haruka naran mai maibé ita lahatene keta lista tama ona ba STAE munisípiu Dili nian,” nia dehan.
Se kazu kona-ba la parezenta lista pasiente mak votasaun móvel sei la akontese iha HNGV, tanba STAE labele atende funsionáriu sira iha ne’ebá.
“Ita atende pasiente, mak ita atende mós doutór sira iha ne’ebé durante ne’e halo akompañamentu pasiente iha ne’ebá,” nia dehan.
Aleinde ne’e, hosi Oé-Cusse mós aprezenta de’it mak doutór sira no lista pasiente sira la aprezenta entaun bele dehan mós sei la akontese votasaun movel iha ospitál referral Oé-Cusse.
Nia dehan, iha ospitál referál sira iha munisipiu seluk mak sei akontese ka fó atendementu votasaun movél ba pasiente inklui ho enfermeira no médiku sira-ne’ebé mak atende moras iha ospitál iha loron votasaun ne’e.
“Ita simu informasaun katak pasiente iha Ospitál referál Covalima hamutuk 41 no pesoál saúde hamutuk 43 no família pasiente hamutuk 40 inklui ho ema ida laiha kartaun eleitorál. Lista pasiente iha Manufahi hamutuk 35 no lista pasiente ho nia família iha Ospitál Referál Baucau hamutuk 240 no pesoal saúde hamutuk 120,” nia relata.
Jornalista : Osória Marques
Editór : Cancio Ximenes
