CNE la utiliza pergunta dalen portugés iha debate tanba tempu

DILI, 15 marsu 2022 (TATOLI)- Prezidente Komisaun Nasionál Eleisaun (CNE, siglá portugés), José Agostinho Belo, hateten CNE la konsege utiliza dalen portugés iha debate entre kandidatu Prezidente Repúblika 2022-2027 tanba kestaun tempu.
Notísia Relevante: Ekipa susesu kandidatu PR lamenta preparasaun CNE ba debate públiku
“Tanba tempu kle’ur liur ona no kandidatu sira aban hakarak ba kampaña ikus no ita mós rekuiñese diskusaun la’o naruk kandidatu ne’ebé fó sira-nia hanoin tanba ne’e sesaun pergunta no resposta ho lian portugés iha maibé kandidatu hotu kolen ona tanba sira mak debate nune’e ita rona,” Prezidente CNE ne’e hateten ba jornalista sira iha Novo Turizmu, tersa (15/03).
Maibé, nia dehan, normalmente pergunta sira-ne’ebé fó bele transmite ona eleitór sira atu tetu bainhira ba ezerse sira nia diretu votu iha eleisaun prezidensiál 2022 ne’ebe sei rtealiza iha 19 marsu.
Nia hateten, ho mensajen no projesaun ka argumentu sira-ne’ebé di’ak, kandidatu sira hato’o ne’e bele muda eleitór sira-nia hanoin bele ba vota iha sentru votasaun
Nu’udar na’in ba debate ne’e, nia mós husu deskulpa ba kandidatu no povu tomak kona-ba fallansu tékniku ne’ebé iha durante iha prosesu debate iha transmisaun direta GMNTV nian.
“Kestaun tékniku balun ne’ebé mosu ne’e, ha’u husu deskulpa ba kandidatu no povu hotu maibé la’ós tanba ema ida-nia hakarak maibé situasaun sira-ne’e mosu no ita haree ba pozitivu sei hadi’a beibeik ba oin kualidade,’’ nia hateten.
Mezmu nune’e, Prezidente CNE ne’e garante kualidade transmisaun GMNTV haree ba teknolojia ho kualidade maibé mosu prosesu fallansu tékniku ne’e rekuñese.
Enkuantu debate públiku entre kandidatu PR 2022-2027 na’in-16 ne’e hahu iha tuku 20h00-14h30 madrugada.
Jornalista : Nelson de Sousa
Editór : Cancio Ximenes

