Autoridade RAEOA apoia karreta 26 ba STAE transporta materiál eleisaun

OÉ-CUSSE, 17 marsu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, apoia karreta unidade 26 ba Sekretariadu Tékniku Administarasaun Eleitorál (STAE), hodi transporta materiál sensitivu no la’os-sensitivu ba sentru votasaun 60 iha rejiaun ne’e.

Prezidente Autoridade RAEOA, Arsénio Paixão Bano, esplika, autoridade apoia transporte 26, identifika hosi sekretáriu rejionál na’in-hitu, atu fó apoia ba STAE, nune’e bele fó susesu ba eleisaun prezidensiál iha Oé-Cusse.

“Iha fulan kotuk ita simu pedidu ida hosi STAE atu husu apoiu transporte tula materiál ba sentru votasaun, nomoos apoia iluminasaun no bee-moos, entaun direita konfirma ba patrimóniu Estadu identifika karreta iha Sekretáriu Rejionál sira hotu, no orienta Diresaun Infraestrutura halo iluminasaun no fasilita bee-moos iha sentru votasaun hotu-hotu, ne’ebé ba karreta ita konsege hetan karreta 26 mak ita apoia ona ba ekipa STAE,” Arsenio Paixão dehan ba Agência Tatoli liuhosi telefónika, kinta ne’e.

Nia informa, antes ne’e hosi Polísia Nasionál Timor-Leste mós husu apoia maibé karreta hotu-hotu identifika ona ba STAE, entaun autoridade konfirma ba patrimoniu Estadu nasionál dehan apoia ona karreta tolu ba PNTL Oé-Cusse.

“Autoridade nia intensaun hakarak eleisaun ne’e la’o ho susesa, labele falla iha ahi eletrisidade bee-moos no transporte, tán ne’e mak autoridade intervein atu fó ajuda ba buat sira-ne’e hotu, tanba eleisaun ne’e Timor-Leste nian, entaun ita tenke koopera no fasilita malu, hodi fó susesu ba eleisaun iha Oé-Cusse no ba Timor-Leste,” nia katak.

Diretora STAE Oé-Cusse, Luiza da Costa, fó-sai katak, STAE prepara ona karreta hamutuk 36, komposta hosi karreta aluga 10 no karreta 26 apoia hosi autoridade RAEOA, atu fasilita transporta materiál sensitivu no la’ós-sensitivu hamutuk ho órgaun eleitorál no seguransa ba iha sentru votasaun, komesa loron sesta 18 to’o sábadu 19 marsu.

Entretantu, totál eleitór hosi RAEOA ne’ebé sei partisipa iha eleisaun prezidensiál 19 marsu 2022 hamutuk 51.495 komposta hosi mane 26.232 no feto 25.263, ho totál sentru votasaun 60 no estasaun votasaun 88, ne’ebé sei envolve brigadista na’in-60 no ofisiál eleitorál na’in-880.

Notísia relevante: Eleisaun prezidensiál hela de’it loron tolu, PNTL Oé-Cusse iha de’it karreta ida

Jornalista   : Abílio Elo Nini
Editór         : Evaristo Soares Martins