DILI, 19 marsu 2022 (TATOLI)—Relasiona ho eleitór sira iha sentru votasaun paralelu ne’ebé la konsege vota, Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco, hateten eleitór sira-ne’ebé la vota iha sentru votasaun paralelu ne’e tanba eleitór sira ba foti de’it deklarasaun xefe suku nian iha sede suku maibé la rejista iha STAE entaun sira-nia naran lasai iha sistema.
“Atu vota iha paralelu tenke rejistu iha STAE nia ekipa ne’ebé destaka iha postu adminiatrativu sira iha munisípiu Dili nian. Se la rejistu iha ne’ebá, konserteza naran lasai iha sistema no labele ezerse sira-nia direitu votu,” Acilino Manuel Branco hateten Agência TATOLI, via telefónika, sábadu ne’e.
Diretór Jerál ne’e haktuir, mezmu sira ba rejistu iha sede suku no foti deklarasaun iha xefe suku maibé deklarasaun la to’o ka la rejistu iha STAE mak sira-nia naran lasai duni iha sistema.
“Tanba ne’e, eleitór balun labele ezerse sira-nia iha loron ida ohin ne’e maibé ida-ne’e mak mekanizmu atendimentu ba eleitór sira-ne’ebé iha impedimentu no razaun eskola, servisu, moras no halo negósiu iha Dili. Maibé dala ida tán, bainhira eleitór la rejista iha STAE mak naran sei la mosu iha sistema no sei la vota,” nia esplika.
Kestaun ne’e, nia dehan, nia rasik simuona informasaun liuhosi telefónika katak ema balun la vota maibé STAE halo tuir lei ne’ebé mak iha.
Eleitór ka votante sira-ne’ebé ezerse sira-nia votu iha sentru votasaun paralelu tolu ne’ebé Governu estabeles iha kapitál Dili ne’e hamutuk 4.032.
Notísia Relevante: STAE rekolla dadus eleitór 4.032 vota iha sentru votasaun paralelu
Jornalista : Osória Marques
Editór : Cancio Ximenes
