DILI, 19 marsu 2022 (TATOLI)-Kandidata Prezidente Repúblika (PR) ho númeru sorteiu hitu (7), Maria Helena Lopes de Jesus “Milena Pires”, lakon iha nia sentru votasaun eskola primária 05 Kampung Baru, Komoro ho de’it votu 79.
Kandidatu José Ramos Horta ho númeru sorteiu 14 mak votu aas liu 2.056, tuir fali Francisco Guterres Lú Olo ho númeru sorteiu neen (6) ho votu hamutuk 504, tuir fali Lere Anan Timur, númeru sorteiu ualu (8) ho votu 264, Mariano Sabino Asanami, númeru sorteiu 16 ho votu 217, tuir fali Armanda Berta dos Santos, númeru sorteiu sia (9) ho votu 196.
Kandidatu seluk hanesan Hermes da Costa Correia ho votu 32, Isabel da Costa Ferreira ho votu 25, Anacleto Bento Ferreira votu 17, Rogério Lobato 12, Martinho Gusmão ho votu ualu, Antero Benedito votu neen, Virgílio da Silva Guterres ho votu haat, Felizberto Araújo Duarte ho votu haat, no Maria Ângela ho Constâncio Pinto la hetan votu hosi eleitór sira.
Tuir kontajen hosi ofisiál orgaun eleitorál Sekretariadu Tékniku Administrasaun Eleitorál (STAE) rejista totál votu nulu 31, branku sia, reklamadu no rejeitadu laiha.
Sentru votasaun ne’e hetan observasaun hosi fiskál kandidatu nian, Komisaun Nasionál ba Eleisaun (CNE-sigla portugés) no seguransa hosi Polísia Nasionál Timor-Leste (PNTL).
Votante ne’ebé vota iha sentru votasaun hamutuk 3.464 kompostu hosi mane 1.805 no feto 1.659.
Suku Komoro, postu adminiatrativu Don Aleixo, munisípiu Dili, rejista eleitór hamutuk 30.497 ho sentru 12.
Notísia relevante: Milena Pires: “Manán ka lakon ne’e votante sira mak sei deside”
Jornalista : Osória Marques
Editora : Rita Almeida
