Top

Hermes Barros-PUDD deside apoiu Horta iha eleisaun segunda volta

Kandidatu Prezidente Repúblika independente ba períodu 2022-2027, Hermes da Rosa Correia Barros, ezerse ona ninia votu iha Eskola EBF Ai-turi laran Temporál, suku Lahane Osidentál, sábadu (19/03). Imajen TATOLI/Tomé Amado

DILI, 23 marsu 2022 (TATOLI)—Kandidatu Prezidente Repúblika indepedente, Hermes da Rosa Correia Barros, no Prezidente Partidu Unidade Dezenvolvimentu Demokrátiku (PUDD) deside fó apoiu tomak ba kandidatu mais votadu, José Ramos Horta, bainhira akontese eleisaun prezidensiál segunda volta.

“Hakarak fó apoiu tanba razaun fuan ba oin ida-ne’ebé di’ak no komunikasaun ne’ebé hala’o iha pozitivu tebes hanoin di’ak ba povu,” Hermes Barros hato’o lia hirak ne’e ba jornalista sira hafoin halo sorumutu komunikasaun polítika ho José Ramos Horta iha rezidénsia Faról, kuarta ne’e.

Kandidatu Xefe Estadu 2022-2027 ho númeru sorteiu rua (2), sei fó orientasaun no apela ba apoiante no simpatizante ne’ebé antes ne’e fó ona votu ba nia atu eleisaun segunda volta fó  apoiu ba Ramos Horta.

Iha fatin hanesan, José Ramos Horta, hateten hafoin eleisaun primeira volta iha kontaktu oioin kada kandidatu halo ho nia parte ativu loos no simu mós lidér hosi partidu balun.

“Ha’u-nia kandidatu iha primeira volta kedas simu hotu-hotu no agora iha de’it kandidatu rua mak buka konsolida votasaun primeiru no bele aumenta tan eleitoradu partidu sira seluk,” nia dehan.

Horta la esplika kandidadu no partidu ne’ebé mak halo ona komunikasaun maibé nia fiar iha eleisaun segunda volta sei fó votu aumenta liután hodi manán.

Entretantu, Prezidente Partidu Unidade Dezenvolvimentu Demokrátiku (PUDD), Silvestre Xavier Sufa, hateten liuhosi reuniaun estrutura partidu PUDD nian hosi nasionál to’o baze iha tersa ne’e (23/03) deside hodi fó apoiu ba kandidatu mais votadu José Ramos Horta iha eleisaun segunda volta.

Apoiu ne’e ho razaun tanba kandidatu Horta indika hosi partidu CNRT, lideradu hosi Xanana Gusmão, ne’ebé durante ne’e sempre halo komunikasaun polítika di’ak ho PUDD.

“Ho nune’e PUDD laiha objesaun sei mobiliza rekursu no masa tomak hosi baze to’o nasionál hodi apoiu kandidatu Horta hodi hetan vitória,” nia hateten hafoin ho estrutura partidu hasoru malu ho Ramos Horta iha rezidensia Faról, kuarta ne’e.

Enkuantu, iha eleisaun primeiru ronde PUDD fó apoiu ba kandidatu Prezidente Repúblika, Martinho Germano da Silva Gusmão.

Bazea ba rezultadu ikus ne’ebé Sekretariadu Tékniku Administrasaun Eleitorál (STAE) fó sai, Kandidatu Prezidente Repúblika (PR) hosi CNRT Jose Ramos Horta hetan votu 301,481 (46,58%), kandidatu PR hosi FRETILIN Francisco Guterres “Lu-Olo” hetan votu 143,408 (22,16%).

Kandidata hosi KHUNTO Armanda Berta dos Santos hetan votu 56,289 (8,70 %), kandidatu independente Lere Anan Timur hetan votus 48,959 votu (7,57%), kandidatu hosi PD Mariano Assanami Sabino hetan 47,008 votus (7,57%), kandidatu hosi PDRT Anacleto Bento Fereeira hetan 13,059 (2,02 %).

Kandidatu indendente Martinho da Silva Gusmao hetan votu 8,485 (1,31% ), kandidatu independente Hermes da Rosa Correia Barros hetan votu 7,58 (1,23%), kandidata indendente Milena Pires hetan votu 5,335 (0,082%), kandidata independente Isabel da Costa Ferreira hetan votu 4,165 (0,64%).

Kandidatu independente Felizberto Araújo Duarte hetan votu 2,615 (0,40 %) Constancio Pinto hetan votus 2,474 (0,38%), kandidatu independente Rogerio Tiago Lobato hetan votu 2,028 (0,31%), kandidatu independente Virgílio da Silva Guterres hetan votu 1,685 (0,26%), kandidatu independente Antero Benedito hetan votu 1,531 (0,24 %) no kandidata independente Ángela Freitas hetan votu 692 (0,11%).

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!