PNDS sei re-dezeñu Uma Kbiit Laek 19 iha área rurál

DILI, 23 marsu 2022 (TATOLI)—Diretora Programa Nasionál Dezenvolvimentu Suku (PNDS), Claudinha Soares Pinto, hateten ekipa PNDS sei halo re-dezeñu ba Uma Kbiit Laek (UKL) hamutuk 19 ne’ebé atu konstrui iha área rurál ne’ebé fatin ne’e labele asesu dalan.
“Ami re-dezeñu fali uma ho métodu implementasaun foun ba uma 19 ne’ebé atu konstrui iha área rurál ne’ebé fatin ne’e labele asesu dalan no susar transporta materiál konstrusaun atu konstrui Uma Kbiit Laek refere,” Claudinha Soares hateten ba Agência TATOLI, via telefónika, tersa ne’e.
Uma Kbiit Laek 19 nia dezeñu ne’e sei la hanesan ho ida uluk tanba PNDS hakarak halo uma simples, nune’e nia orsamentu tenke aloka barak ba ema atu lori materiál ba benefisiáriu nia fatin.
“Agora ami halo uma 19 ne’e simples de’it tanba ami atu aloka osan barak ba mobilizasaun traballadór para selu ema hodi lalin materiál kontrusaun tanba dalan ladi’ak, nune’e aloka osan atu bele aluga kuda, se lae ita bele aluga ema lori sasán to’o benefisiáriu nia fatin ne’e,” nia dehan.
Daudaun ne’e ekipa sei halo nia manuál lai tanba buat hotu tuir matadalan, bainhira laiha manuál ida mak guia hanoin sei kontra fali regra ne’ebé estabelese ona.
“Iha fulan marsu ne’e ita seidauk bele implementa regra ba konstrusaun uma 19 ho planu dezenu foun ne’e, tanba ita-nia atividade barak liu-liu konstrusaun UKL tinan 2022 ho uma 4.000 ne’e ita sei implementa iha fulan ne’e nia-laran. Maibé ami hanoin uma 19 la barak tanba ne’e bainhira re-dezeñu hotu mak foin bele hahú,” nia dehan.
Aleinde ida-ne’e, PNDS mós sei iha atividade projetu 6.000-resin kompara ho uma 19 ne’e, ne’ebé ida-idak la’o tuir nia dalan maibé PNDS tenke implementa rpograma Uma Kbiit Laek (UKL) 2022 iha tinan ne’e.
“Maibé agora ami iha ona etapa hitu ba preparasaun detallu hodi halo ajustamentu nia dezenu sira, entaun ita sei falta tan etapa rua para tama fíziku ka hahú konstrui uma,” nia hateten.
Konstrusaun Uma Kbiit Laek 19 ne’e iha munisípiu Baucau, Manatuto, Covalima no Lautém mak seidauk bele konstrui tanba dalan ladi’ak.
Jornalista : Osória Marques
Editór : Cancio Ximenes

