Komandu PNTL atribui promosaun diviza ba saudozu Moises Kelu

OÉ-CUSSE, 25 marsu 2022 (TATOLI) – Komandante Jerál Polísia Nasionál Timor-Leste (PNTL), Komisáriu Faustino da Costa, seste ne’e fó-sai despaxu ho númeru 198/CG-PNTL/III/2022, atribui promosaun diviza ho títulu esesionál Postu Sarjentu ba saudozu Moises Kelu ho númeru 10985.

Promosaun ba títulu esesionál Postu Sarjentu ba saudozu Mateus Kelu, bazea ba dekretu-lei númeru 16/2009, 18 marsu, ne’ebé aprova Rejime Promosaun no satisfasaun kondisaun jerál no espesiál promosaun ne’ebé prevista iha artigu 12 no 15 iha rejime refere.

Promosaun ho títulu esesionál konsiste iha asesu ba postu superiór, verikadu presupostu ne’ebé konsta iha artigu 11 iha Rejime Promosaun ne’e.

Kompeténsia ne’ebé atribui hosi Komandante Jerál Polísia Nasionál Timor-Leste, bazea mós ba alínea H, númeru 3 artigu 10, hosi dekretu-lei númeru 9/2009, 18 fevereiru ne’ebé aprova lei orgánika PNTL nian, konjuga ho númeru 2 artigu 32 iha rejime ne’e.

“Determinu promosaun títulu esesionál postu sarjentu ba saudozu ajente xefe númeru 10985-Moises Kelu, bazea ba artigu 11, konjuga ho númeru 4 artigu 5, no númeru 2 artigu 32, iha Rejime Promosaun (RP) PNTL nian, ho efeitu hahú hosi ohin. Komunika mós despaxu hosi Ministru Interior,” refere dokumentu ne’ebé Agência Tatoli asesu, iha sesta ne’e.

Molok selebra fúnebre, Komandante PNTL RAEOA, Superintendente Xefe, Mateus Assunção Mendes, hatete, parte komandu distritál simu ona preokupasaun hosi família kona-ba matebian nia oan kiak nia vida moris iha futuru, sei enkamiña ba nasionál.

“Saida mak ohin sujestaun hato’o mai hosi família, komandu distritál sei enkamiña nafatin ba leten, maibe prosesu atu asegura nia oan-sira na’in-rua ne’e, liuhosi diviza ohin ha’u entrega ba nia oan mane, ho nia vensimentu kada fulan simu $280.00, maibé presiza kompleta dokumentu ba administrasaun PNTL,” Mateus Assunção Mendes, ko’alia iha bairru Masin, suku Costa, sub-rejiaun Pante Makasar.

Reprezentante família matebian, Constâncio Suni, husu perdaun ba instituisaun PNTL, ba matebian nia komportamentu durante hakna’ar-aan iha seguransa.

“Karik durante ne’e ami-nia maun no aman matebian Metues Kelu, halo sala ruma karik, ami husu deskulpa, no ami agradese ba apoia tomak durante ne’e, to’o ohin ikus iha selebrasaun fúnebre,” nia katak.

Biografia

Saudozu Sarjentu Moises Kelu, moris iha suku Ban-Afi, sub-rejiaun Nítibe, iha loron 24 fevereiru 1962, nu’udar oan dahuluk hosi maun alin na’in-neen (6), hosi fuan domin, Cipriano Sufa (falesidu) no Blandina Tolo (falesida). Iha tinan 1991 matebian hahú nia estudu iha eskola primária SDN-1 iha Pante Makasar no remata iha 1997.

Esperiénsia serbisu

Iha 24 jullu 1990 to’o 1999, matebian nu’udar Polísia Nasionál Repúblika Indonesia (POLRI) no 26 fevreiru 2001 kontinua serbisu iha Polísia Nasionál Timor-Leste (PNTL), ne’ebé hahú formasaun dahuluk ba PNTL iha turma hitu ho númeru ID 10985, no matebian envolve mós kursu bázika to’o 27 juñu 2001 matebian halo graduasaun iha sentru formasaun polísia Comoro, Dili.

Nune’e iha 1 agostu 2001, matebian hahú estájiu iha komandu PNTL distritál Oé-Cusse, hodi hetan orden kolokasaun ba sesaun tránzitu, to’o 27 marsu 2006, matebian hetan medalla Komandu Operasaun Konjunta.

To’o iha 27 marsu 2010, matebian hetan promosaun diviza hosi ajente ba ajente prinsipál, to’o 27 marsu 2016 matebian hetan promosaun deviza hosi ajente prinsipál ba ajente xefe, no hetan louvor komportamentu ezemplár.

Iha 1 fevereiru 2018, matebian hetan orden transferénsia hosi sesaun tranzitu ba esquadra Pante Makasar, to’o loron 24 marsu 2022 oras tuku 02:00, matebian hakotu iis iha Hospitál Refererál Oé-Cusse (HRO) hodi husik hela oan-ki’ak na’in-rua, feto ida no mane ida, nune’e, iha 24 marsu 2022 hanesan loron ikus nia peregrinasaun iha mundu, matebian hetan promosaun esepsionál hosi diviza ajente xefe ba sarjentu.

Notísia relevante: Sarjentu Moises Kelu hakotu iis iha RAEOA

Jornalista   : Abílio Elo Nini
Editór         : Evaristo Soares Martins