Top

Governu presiza renova pasaporte estudante timor-oan 20 iha Filipina

Membro Deputado KHUNTO, António Verdial De Sousa. Imajen/Tatoli Egas Cristovao

DILI, 29 marsu 2022 (TATOLI)—Deputadu Bankada Parlamentár hosi partidu Kmanek Haburas Unidade Nasionál Timoroan (KHUNTO), António Verdiál de Sousa, husu Governu presiza atende renova pasaporte estudante timor-oan sira-nian ne’ebé data invalidu ona no oras ne’e hela nafatin iha Filipina.

“Governu halo kooperasaun hodi haruka asisténsia tékniku ida hodi ba iha Fiplina ho objetivu atu reprodús ka renova pasaporte ba timor-oan na’in 20 ne’ebé sira-nia pasaporte invalidu ona,” Deputadu António Verdiál de Sousa levanta iha plenária Parlamentu Nasionál, tersa ne’e.

Timoroan sira-ne’e, hanesan estudante antes ne’e labele fila-fali mai iha Timor-Leste tanba ho situasaun pandemia COVID-19.

Bainhira sira iha inisiativa atu mai rasik renova sira-nia pasaporte maibé ho difikuldade aviaun no visa, tanba bainhira liu semana ida tenke presiza visa.

“Nune’e, fasil liu karik Governu haruka tékniku hodi bele ba fó asisténsia direta atu halo bele renova estudante sira-nia pasaporte,” nia hateten.

Prezidente Komisaun G trata asuntu Edukasaun ne’e, dehan tuir informasaun ne’ebé komisaun simu katak embaixada Timor-Leste iha Filipina haruka tiha ona karta mai iha Ministéiru Justisa hodi fó asisténsia maibé to’o agora seidauk iha resposta.

Nia preokupa la’ós ne’e de’it maibé iha mós timor-oan iha nasaun Vietname ho preokupasaun hanesan no Komisaun G haruka ona karta ofisiál ba Ministéiru Justisa maibé to’o daudaun ne’e seidauk hatán.

Hatán ba kestaun ne’e, reprezenta Governu liuhosi Sekretáriu Estadu Komunikasaun Sosiál (SEKOMS), Merício Juvinal Akara, rejista hela no sei enkamina ba ministéiru tutela hodi tau atensaun.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!