ELEISAUN, NASIONÁL

CNE indika Pe. Bento Barros sai moderadór ba debate púbiku daruak

CNE indika Pe. Bento Barros sai moderadór ba debate púbiku daruak

Reprezentante Amo Bispo Dioceze Dili, Padre Bento Barros

DILI, 11 abríl 2022 (TATOLI)—Vise Prezidente Komisaun Nasionál Eleitorál (CNE-sigla portugés), Domingos Barreto, hateten CNE indika Pe. Bento Barros Perreira mak sai moderadór hodi modera debate públiku daruak entre kandidatu Prezidente Repúblika períodu 2022-2027 iha salaun Oka Rudal 7984, Surikmas, Dili.

Notísia Relevante: CNE indika RTTL, E.P halo transmisaun direta debate públiku ba kandidatu PR

“Pe. Bento Barros Perreira mak sai moderadór ba debate públiku entre kandidatu Prezidente Repúblika, José Ramos Horta no Francisco Guterres Lú Olo, ne’ebé sei realiza iha 13 abríl,” Vise Prezidente CNE ne’e hateten ba Agência TATOLI, via telefónika, segunda ne’e.

CNE indika Pe. Bento Barros Perreira tanba padre refere iha esperiénsia sai hanesan moderadór ida hosi igreja tanba nia hanesan ema ida-ne’ebé independente ne’ebé bele lori debate ne’e hetan susesu.

“Ita hakarak ema independente mak modera debate ba kandidatu Prezidente Repúblika nian iha kampaña eleisaun segunda volta iha eleisaun prezidensiál 2022 ne’e,” nia dehan.

Razaun hili Pe. Bento Barros Perreira tanba iha debate públika ne’ebé CNE realiza kampaña primeira volta iha 15 marsu 2022 liubá ne’e, ema barak kestiona moderadór Expedito Dias Ximenes ninia pozisaun ne’ebé dalabarak la independente hodi lidera debate refere.

“Ema kestiona dehan moderadór la independente entaun ho preokupasaun sira-ne’e, CNE deside indika Pe. Bento Barros Perreira mak modera fali iha debate públika ba kandidatu PR tuir mai ne’e,” nia dehan.

Iha debate públiku ne’e, nia dehan, sei fahe ba segementu haat mak segementu dahuluk  halo intervensaun hosi kandidatu sira, segementu daruak pergunta relasiona ho tema Konstituisaun RDTL no Relasaun Internasionál no seluk tán, segementu datoluk mak pergunta no resposta entre kandidatu (livre) no segementu ikus mak hato’o sira-nia mensajen.

Notísia Relevante: GMN TV sei halo transmisaun direta ba debate kandidatu PR 2022-2027

Perguntas ne’ebé sei husu ba kandidatu PR ne’e sei nafatin hanesan perguntas sira-ne’ebé akademiku no sosiedade sivíl Timor-Leste elabora ba debate públiku iha eleisaun primeira volta liubá ne’e.

“Ita elabora pergunta la halai sees hosi papel Prezidente Repúblika nian. Pergunta hirak-ne’e sosiedade sivil no akademista sira mak elabora iha debate ida uluk nian ne’e,” nia esplika.

CNE indika fali Rádiu Televisaun Timor-Leste (RTTL) mak sei halo transmisaun direta ba debate públika entre kandidatu Prezidente Repúblika José Ramos Horta no Francisco Guterres Lú Olo, tanba esperiénsia fallansu tékniku ne’ebé mak akontese iha debate primeira volta ne’ebé halo populasaun sira kestiona makaas ba empreza privadu ne’ebé Governu fó fiar bá.

“Ho esperiénsia ne’e mak tenta atu halo di’akliu, maibé kestaun tékniku ne’e ita la espera,” nia dehan.

Iha debate ne’e sei partisipa mós hosi kandidatu PR na’in-14 ne’ebé mak foin lalais konkore iha eleisaun prezidensiál, observadór nasionál no internasionál inklui funsionáriu CNE no RTTL, E.P nia ekipa produsaun sira.

Debate ne’e, tuir planu, sei hala’o iha loron 13 abríl 2022 ne’ebé sei hahú hosi tuku 18h00 no sei ramata iha tuku 21h00 kalan.

Iha serimonia debate públiku ne’e, artista Maria Vitória mak sei hananu múzika abertura Hino Nasionál “Patria! Patria!” no sei iha muzika interkala ne’ebé lori hosi artista Maria Vitoria (MARVI) no Tony Perreira.

Ajenda debate daruak entre kandidatu Prezidente Repúblika períodu 2022-2027, José Ramos Horta no Francisco Guterres Lú Olo, ne’ebé CNE sei realiza iha loron 13 abríl 2022 iha Salaun OKA Rudál ho nia oráriu no resposavel sira;  

Notísia Relevante: Debate para dalan klaran, Prezidente CNE dehan normál

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!