Top

Deputada CNRT preokupa pagamentu subsídiu ba jornalista liña frente

Eis Prezidente Komisaun C-PN, Fernanda Lay. Imajen Tatoli/António Gonçalves.

DILI, 12 abríl 2022 (TATOLI)—Deputada hosi Partidu Congresso Nacional Reconstrução Timorense (CNRT) iha Parlamentu Nasionál, Fernanda Lay, preokupa ho prosesu pagamentu subsídiu ba jornalista liña frente ne’ebé la’o kleur tebes, maske jornalista sira mós presta ona servisu iha ámbitu COVID-19.

Notísia Relevante: MF haruka lista liña frente jornalista ba MAPKOMS molok prosesa pagamentu

“Ha’u lamenta bainhira Governu lori prosesu pagamentu subsídiu ba jornalista liña frente ne’ebé to’o agora seidauk simu mezmu liña frente seluk hetan ona sira-nia direitu. No, agora Ministériu Finansa atu selu de’it maibé sei dada ba-mai, hein tarde demais atu selu jornalista sira. Tanbasá sai nune’e no ha’u sei foti asuntu ne’e to’o selu,” Deputada ne’e hateten iha Parlamentu Nasionál, tersa ne’e.

Fundu COVID-19 ne’e, Parlamentu Nasionál aprova ho urjénsia atu bele responde kestaun hirak ne’e liu-liu pagamentu subsídiu ba liña frente sira.

Fernanda Lay, konsidera jornalista hala’o servisu sosiál importante tebes liuhosi atividade jornalístika hodi halo kobertura no haklaken notísia ba públiku hanesan aktu hodi kombate COVID-19 iha Timor-Leste.

Komunikadu Ministéiru Finansa iha 08 abríl informa ona konaba atrazu pagamentu suplementu remuneratóriu liña frente ba jornalista sira tinan 2021, tanba lista ne’ebé simu la tuir dekretu lei númeru 1/2022, 5 janeiru.

Dekretu-lei númeru 1/2022, 5 janeiru, kria subsídiu ba profisional ne’ebé dezenvolve atividade jornalístika ne’ebé solisita husi Governu hodi fornese notísia kona-ba virus SARS-COV2 durante estadu emerjénsia.

Iha diploma ne’e liu-liu iha númeru 1 artigu 2 hateten, duploma refere estabelese ba profisionál ne’ebé dezenvolve atividade jornalístika hamutuk ho Sala Situasaun Sentru Integradu Jestaun Krize ka ida-ne’ebé Governu husu hodi prodús notísia durante períodu 1 abríl to’o 31 dezembru 2021, sei atribui subsídiu pekuniáriu ba kada loron servisu efetivu benefisiáriu nian iha kondisaun direta expozisaun ba vírus SARS-Cov2, durante deklarasaun períodu Estadu emerjénsia.

Iha númeru 2 artigu 2 diploma refere haktuir, subsídiu ne’ebé refere anteriormente iha valór $5,00 ba kada loron servisu efetivu.

Iha númeru 3 artigu 2 diploma refere hateten, subsídiu ida-ne’e bele de’it atribui bainhira iha despaixu aprovasaun lista ba profisionál ne’ebé dezenvolve atividade jornalístika hosi Ministru Asuntu Parlamentár no Komunikasaun Sosiál (MAPKOMS) ho baze ba informasaun ne’ebé fornese hosi Sala Situasaun Sentru Integradu Jestaun Krize ka hosi Dirasaun Nasionál Diseminasaun Informasaun (DNDI) hosi MAPKOMS nian.

Bazea ba Dekretu-Lei númeru 1/2022, 5 janeiru ne’e, iha loron 24 marsu 2022, MAPKOMS submete pedidu pagamentu mai Sekretariadu Tékniku Fundu COVID-19.

Notísia Relevante: Aban, MAPKOMS submete lista naran jornalista liña frente 507 ba MF

Primeira lista ne’e kompostu hosi jornalista hosi instituisaun mídia oioin ho totál benefisiáriu hamutuk 288 ne’ebé indika mós fatin ba halo kobertura no primeira lista ne’e hetan aprovasaun hosi MAPKOMS liuhosi despaixu númeru 01/MAPCOMS/I/2022.

Maibé, tanba lista ne’e iha duplikasaun no balun konta bánkaria benefisiáriu la loos, nune’e Ministériu Finansa devolve fila-fali ba MAPCOMS hodi hadi’a.

Iha 28 marsu 2022, MAPKOMS submete fila-fali lista jornalista sira-nian mai Ministériu Finansa atu bele prosesa no iha segundu lista ne’e kompostu hosi jornalista hosi instituisaun mídia oioin ho totál benefisiáriu 507 ho totál orsamentu hamutuk $371.400,00.

Maibé lista daruak ne’e la indika fatin ba halo kobertura no laiha despaixu aprovasaun hosi Ministru Asuntu Parlamentar no Komunikasaun Sosiál (MAPKOMS), Francisco Jerónimo.

Lista segundu ne’e ho benefisiáriu hamutuk 507 ne’ebé submete ne’e mós la’ós de’it jornalista, operadór kamera no motorista sira maibé inklui mós pesoál administrasaun hanesan aprovizionamentu, rekursu umanu no lojistika inklui mós mídia officer Gabinete Ministru Prezidénsia Konsellu Ministru.

Tanba ne’e, Sekretariadu Tékniku Fundu COVID-19 husu opiniaun jurídika ba Gabinete Apoiu Jurídiku Ministeriu Finansa molok prosesa pagamentu suplementu remuneratóriu liña frente ba jornalista sira.

Bazea ba dispozisaun legál ne’ebé iha Gabinete Apoiu Jurídiku konklui katak, pagamentu subsídiu ba profisionál ne’ebé dezenvolve atividade jornalístika ne’ebé solisita hosi Governu hodi fornese notísia kona-ba Vírus SARS-COV2 durante Estadu emerjénsia bele de’it atribui bainhira iha despaixu aprovasaun ba lista profisionál ne’ebé dezenvolve atividade jornalístika hosi MAPKOMS.

Atribuisaun ne’e ho baze ba informasaun ne’ebé fornese hosi Sala Situasaun Sentru Integradu Jestaun Krize ka hosi Dirasaun Nasionál Diseminasaun Informasaun (DNDI) hosi MAPKOMS nian, konforme tuir numeru 3 artigu 2 Dekretu-Lei númeru 1/2022, 5 janeiru.

Tanba ne’e, atu aselera prosesu pagamentu ne’e, Sekretariadu Tékniku Fundu COVID-19, haruka ona paresér ba MAPKOMS atu fornese despaixu aprovizionamentu nu’udar lista definitivu ho respeitu ba norma ne’ebé regula iha númeru 3 artigu 2 dekretu-lei númeru 1/2022, 5 janeiru, nune’e bele fasilita prosesu pagamentu ho lalais.

Iha tinan 2020, Sekretariadu Tekniku Fundu COVID-19 mos realiza ona pagamentu suplementu remuneratóriu liña frente ba jornalista sira ho totál benefisíariu 216 ho totál orsamentu $97.425,00 ba períodu fulan tolu.

Notísia Relevante: Governu konklui suplementu remuneratóriu ba jornalista liña frente hamutuk 216

Jornalista : Nelson de Sousa

Editór     : Cancio Ximenes

Publisidade

Leave a Reply

Latest Post

error: Content is protected !!